ԱՄՆ-ը սիրիական ընդդիմությանը կտրամադրի հավելյալ՝ 54 միլիոն դոլարի չափով օգնություն: Այս մասին Կոնգրեսում լսումների ժամանակ հաղորդել է Սիրիայում ԱՄՆ դեսպան Ռոբերտ Ֆորդը:
Ավելի վաղ՝ փետրվարի 28-ին, ԱՄՆ պետքարտուղար Ջոն Քերին Հռոմում հայտարարել էր սիրիացի ապստամբներին 60 միլիոն դոլարի չափով օգնության հերթական փաթեթի տրամադրման մասին: Մինչ այդ ԱՄՆ-ը ընդդիմությանն օգնելու նպատակով տրամադրել էր 385 մլն դոլար: Ամերիկյան վարչակազմն ընդգծում է, որ ընդդիմությանը ցուցաբերում է բացառապես ոչ ռազմական օգնություն:
«Մենք պետք է Մերձավոր Արևելքի սրտում կայունություն ապահովենք և դնենք ազատ Սիրիայի հիմքը, որտեղ կհարգվեն բոլոր քաղաքացիների իրավունքները, և կպահպանվի ազգային միասնությունը… Օգնությունը նախատեսված է ողջ երկրով մեկ ընդդիմադիր խմբերի համար, որպեսզի նրանք կարողանան ստեղծել ցանց՝ կազմված տարբեր ազգեր ու դավանանքներ ներկայացնող ակտիվիստներից»,- ասել է Ֆորդ:
Նրա խոսքով՝ այդ գումարով կգնվեն հաղորդակցական սարքավորումներ և այլ իրեր, ինչպես նաև առաջին անհրաժեշտության ապրանքներ ու դեղորայք:
