Վրացական Apsny.ge կայքի հաղորդմամբ, Վրաստանում գտնվող ամերիկացի սենատորները հանդիպում են ունեցել Քրիստոնեա-դեմոկրատական կուսակցության առաջնորդներից Նիկա Լալիաշվիլիի և Ազատ դեմոկրատներ կուսակցության առաջնորդ Իրակլի Ալասանիայի հետ:
Հանդիպման ժամանակ սենատորները խոստացել են ԱՄՆ-ում բարձրացնել անվտանգության նոր մեխանիզմների մշակման անհրաժեշտության հարցը:
Հանդիպումից հետո Լալիաշվիլին հայտարարել է. «Օկուպացված տարածքներում (Աբխազիա և Հարավային Օսիա) իրավիճակը բավական սրվել է: Այն դուրս է եկել քաղաքական և ռազմական հարցերի շրջանակներից, և այս անգամ խոսքն արդեն մարդկանց կյանքին սպառնացող վտանգների մասին է:
Վերջին շրջանում Վրաստանում տեղի ունեցան մի շարք ահաբեկչական ակտեր, այդ թվում՝ նաև ԱՄՆ դեսպանատան մոտ: Մենք հայտարարել ենք, որ Վրաստանը անվտանգության նոր մեխանիզմների կարիք ունի, որպեսզի խուսափի առաջիկա սպառնալիքներից:
Օկուպացված տարածքներում ստեղծված ահաբեկիչների բույնը պետք է վերացվի: Քանի որ օկուպացված տարածքներում անդադար ընթանում է ռազմական շինարարություն, մեզ իսկապես անհրաժեշտ է պաշտպանական սպառազինություն: Խոսքը հակատանկային և հակահրթիռային սպառազինության մասին է:
Կարծում եմ, որ ԱՄՆ-Վրաստան ձևաչափով գոյություն ունեցող համագործակցության շրջանակներում հաշվի կառնվի այս խնդիրը: Սենատորները խոստացել են անպայման բարձրացնել այս հարցը»:
Հիշեցնենք, որ ամերիկյան սենատորների վրացական այցը նրանց արևելաեվրոպական շրջագայության շրջանակներում է: Այդ այցի արդյունքում պետք է պարզվի, թե ԱՄՆ նախագահ Բարաք Օբամայի` Ռուսաստանի նկատմամբ ձեռնարկած «վերբեռնման քաղաքականությունն» ինչպիսի ազդեցություն է ունեցել Արևելյան Եվրոպայում ԱՄՆ դաշնակիցների անվտանգության վրա:
