Իրանի ԱԳՆ ղեկավար Մոհամմադ Ջավադ Զարիֆը կարծում է, որ միջազգային միջնորդների «վեցյակի» հետ համաձայնագրի կնքումից հետո ամբողջ Մերձավոր Արևելքը պետք է դառնա «միջուկային զենքից ազատ գոտի»: Այս մասին նա գրել է Guardian թերթի կայքում հրապարակված իր՝ «Իրանը պատմական համաձայնագիր է ստորագրել խաղաղ ատոմի վերաբերյալ, հիմա Իսրայելի հերթն է» հոդվածում:
«Գործողությունների համատեղ բազմակողմանի ծրագիրը (Իրանի միջուկային ծրագրի հարցում), ինչպես պաշտոնապես անվանվում է համաձայնագիրը, հաստատում է Իրանի կարգավիճակը որպես միջուկային զենքից ազատ գոտի: Հիմա եկել է ճիշտ ժամանակը, որ մենք ընդլայնենք այդ գոտին այնքան, որ այն ընդգրկի ամբողջ Մերձավոր Արևելքը»,- գրել է Զարիֆը:
Իրանը և «վեցյակը» հուլիսի 14-ի գիշերը ձեռք են բերել պատմական համաձայնագիր Իրանի միջուկային ծրագրի վերաբերյալ: Գործողությունների համատեղ բազմակողմանի ծրագրի կատարումն Իրանի վրայից ամբողջովին կհանի ՄԱԿ ԱԽ-ի, ԱՄՆ-ի և ԵՄ-ի կողմից ավելի վաղ սահմանված տնտեսական և ֆինանսական պատժամիջոցները: Համաձայնագիրը կքննարկվի ԱՄՆ կոնգրեսում:
