Ինչպես հայտնի է, հացադուլի նստած Րաֆֆի Հովհաննիսյանը պահանջում է բոլոր ընտրախախտ մարզպետների հրաժարականը: Գեղարքունիքի մարզում, որտեղ Սևան քաղաքում վերջերս ծեծկռտուք եղավ Րաֆֆի Հովհաննիսյանի հանդիպման ժամանակ Սևանի քաղաքապետ Ռուդիկ Ղուկասյանի մասնակցությամբ, իշխանական թեկնածու Սերժ Սարգսյանը մոտ 5 անգամ ավելի ձայներ է ստացել, քան Րաֆֆի Հովհաննիսյանը: Սա այն դեպքում, երբ Գեղարքունիքի գյուղերից շատերն են արտագաղթել ՌԴ և այլ երկրներ: Ի դեպ, ինքը` Գեղարքունիքի մարզպետ Ռաֆիկ Գրիգորյանը, շարունակում է բնակվել Երևանի կենտրոնում:
– Պարոն Գրիգորյան, Գեղարքունիքի մարզում Րաֆֆի Հովհաննիսյանի վերջին հանդիպումների ժամանակ Սևանում միջադեպ գրանցվեց անձամբ Սևանի քաղաքապետի մասնակցությամբ: Պատրաստվո՞ւմ եք որևէ կերպ պատասխանատվության կանչել քաղաքապետին և ի՞նչ եք անելու այս կապակցությամբ:
– Ինչի՞ համար պատասխանատվության կանչեմ քաղաքապետին: Իրավապահներ եղել են տեղում, նրանք էլ կզբաղվեն այդ հարցով: Դա մարզպետի իրավասության սահմաններում չի: Իսկ ի՞նչ է եղել:
– Սևանի միջադեպի հետ կապված Դուք Ձեր պատասխանատվության բաժինը չե՞ք տեսնում: Չէ՞ որ որպես մարզպետ պարտավոր էիք ապահովել թեկնածուի հանդիպումը ընտրողների հետ:
– Այդ հանդիպումը եղել է ոչ օրինական: Տեսանյութերը դիտելով` կարծում եմ, նորմալ մարդը կհասկանա, թե ով ինչ է ուզեցել անել:
– Րաֆֆի Հովհաննիսյանը պահանջել է բոլոր ընտրակեղծարար մարզպետների հրաժարականը: Քանի որ Գեղարքունիքի մարզում իշխանության թեկնածուն մոտ 5 անգամ ավելի ձայներ է ստացել, պատրաստվո՞ւմ եք հրաժարական տալ:
– Իսկ ո՞վ է Րաֆֆի Հովհաննիսյանը, ճիշտն ասած, ես դա չեմ հասկանում, որ պահանջում է մարզպետների հրաժարականը:
– Րաֆֆի Հովհաննիսյանը նախագահի թեկնածու է, ով ստացել է մոտ 530 հազար ձայն պաշտոնական տվյալներով, և պնդում է, որ ընտրությունները կեղծվել են, իրականում ավելի շատ ձայներ է ստացել, քան Սերժ Սարգսյանը:
– Ասելը քիչ է: Կա ԿԸՀ-ի պաշտոնական հայտարարությունը, և հարցը քննարկվում է Սահմանադրական դատարանում: Թող բարի լինեն համբերեն և սպասեն Սահմանադրական դատարանի վճռին: Իսկ առանց հիմնավորման խոսել, որ հաղթել ենք, կարծում եմ` դա կոռեկտ չի:
– Այսինքն` չե՞ք պատրաստվում հրաժարական տալ նրա պահանջով:
– Անլուրջ եմ համարում էդ պահանջը:
– Իսկ ինչպե՞ս է ստացվել, որ Գեղարքունիքի մարզում մոտ հինգ անգամ ավելի ձայներ է ստացել իշխանության թեկնածուն: Չե՞ք կարծում, որ սա արդեն իսկ ապացուցում է, որ մարզում ակնհայտ ընտրակեղծարարություն է եղել:
– Իսկ ուր էին այն հանձնաժողովի անդամները, որոնք ստորագրել են, որ ընտրությունները կայացել են օրենսդրությանը համապատասխան: Այդ թվում նաև` Րաֆֆի Հովհաննիսյանի հանձնաժողովի անդամները:
– Միգուցե ամբողջությամբ չեն կարողացել ընթացքը վերահսկել, միգուցե իրենց ճնշել են:
– Չեմ կարծում: Կարող է գոնե մեկը նման մի բողոք ներկայացնի:
– Չե՞ք կարծում, որ Ազատության հրապարակում ծավալվող շարժումը ի վերջո հանգեցնելու է հրաժարականների: Ձեր կարծիքով` Սերժ Սարգսյանը կանցնի՞ հացադուլ հայտարարած Րաֆֆի Հովհաննիսյանի դիակի վրայով:
– Ես չեմ ուզում այդ հարցին պատասխանել: Դա անլուրջ հայտարարություն է:
– Մարդը հացադուլ է անում, անլուրջը ո՞րն է:
– Թող անի: Հիմա էդ շրջանն է, կարելի է և պաս պահել, կարծում եմ:
