Sputnik Georgia լրատվական գործակալության փոխանցմամբ՝ Վրաստանի պաշտպանության նախարար Թինա Խիդաշելին լրագրողների հետ զրույցում հայտարարել է, որ ԴԱԻՇ-ի հարցով պետք է զբաղվեն հատուկ ծառայությունները, սակայն պաշտպանության նախարարությունը պատրաստ է օգնել նրանց։
«Հիմնական պատասխանատվությունն ընկնում է ոչ թե պաշտպանության նախարարության, այլ անվտանգության համապատասխան ծառայությունների, ներքին գործերի նախարարության վրա։ Դա ավելի շատ նրանց գործն է։ Բնականաբար, մենք պետք է գտնվենք մշտական պատրաստականության ռեժիմում։ Մենք պետք է պատրաստ լինենք և պետք է օգնենք այդ գերատեսչություններին՝ չեզոքացնելու համար նմանատիպ սպառնալիքները»,- ասել է Խիդաշելին։
Այն բանից հետո, երբ ԶԼՄ-ները տեղեկատվություն տարածեցին, որ Հյուսիսային Կովկասի իսլամական ծայրահեղականները հավատարմության երդում են տվել ԴԱԻՇ-ին, Վրաստանի ներքին գործերի նախարար Վախթանգ Գոմելաուրին, ով շուտով գլխավորելու է նորաստեղծ Պետական անվտանգության ծառայությունը, հայտարարեց, որ Վրաստանն ուժեղացնելու է սահմանների պաշտպանությունը։
