ՀՀ նախագահի աշխատակազմի կողմից տրամադրվող և Հայաստանի երիտասարդական հիմնադրամի կողմից կազմակերպվող դրամաշնորհների մրցույթի հանձնաժողովի հուլիսի 24-ի նիստում որոշվել է 26 ՀԿ-ների տրամադրել դրամաշնորհ՝ շուրջ ինը անվանակարգերում, այդ թվում՝ «Հանրության իրազեկում ծխախոտի օգտագործման և երկրորդային ծխի վնասակար ազդեցությունների վերաբերյալ», «Էկոտուրիզմի զարգացումը՝ որպես բնության պահպանության գրավական», «Հասարակության շրջանում բնապահպանական խնդիրների մասին իրազեկվածության մակարդակի բարձրացում», «Ցեղասպանություն և մշակույթ», «Սահմանամերձ գյուղական համայնքների առաջնահերթ խնդիրների լուծմանն ուղղված միջոցառումների իրականացում» և այլն։
Ներկայացված 26 ՀԿ-ների մեծ մասը, սակայն, չունի ո՛չ հասցե, ո՛չ էլեկտրոնային կայք, ո՛չ հեռախոսահամար, և ոչ էլ առհասարակ համացանցում ընդլայնված որոնման արդյունքում հնարավոր է որևէ տեղեկատվություն ստանալ նրանց գործունեության, գործառույթների և այլնի մասին, օրինակ՝ «Գիտելիքահեն հասարակություն» գիտակրթական ՀԿ-ի կամ «ՍՈՒՐԲ ՀԵՂԻՆԵ» բարեգործական ՀԿ-ի և մնացածի մասին։
«Հանրության իրազեկում ծխախոտի օգտագործման և երկրորդային ծխի վնասակար ազդեցությունների վերաբերյալ» անվանակարգում դրամաշնորհ ստացած «Երիտասարդ դեղագործների ասոցիացիա» ՀԿ նախագահ Գոռ Սարգսյանն «Առաջին լրատվական»-ի հետ զրույցում նշեց, որ իրենց ներկայացրած ծրագիրը նպատակ ունի ծխախոտի վնասակար ազդեցության վերաբերյալ ԼՂՀ հինգ քաղաքների՝ Հադրութի, Ասկերանի, Շուշիի, Մարտունիի և Ստեփանակերտի բնակչության իրազեկվածության մակարդակի բարձրացմանն ուղղված աշխատանք իրականացնել։ Դրա համար տպագրվելու են 4000 բուկլետ և 1500 պոստերներ և բաժանվելու են ԼՂՀ հինգ քաղաքների 300 հաստատատությունների՝ կրթական, առևտրային, և տասը ՀԿ-ների, որպեսզի նրանք էլ իրենց շահառուներին բաժանեն։
Ինչո՞ւ ԼՂՀ-ում և ոչ՝ Հայաստանում. մայիս-հունիս ամիսներին Հայաստանում այս ՀԿ-ն ուսանողների հետ ծխախոտի վնասակարության հետ կապված քննարկումներ է կազմակերպել։ ՀԿ ղեկավարի խոսքով՝ այդ քննարկումների արդյունքում նրանց 30 տոկոսը թողել է ծխելը։ Սա առաջին անգամ է, որ ծրագիրը դիմել է դրամաշնորհի։ Ծրագիրը կսկսվի օգոստոսի 10-ից և կտևի մինչև հոկտեմբերի 1-ը։
Դրամաշնորհի գումարը կազմում է 1 միլիոն 200 հազար դրամ։ Կազմակերպությունն իր կողմից կունենա ներդրումներ։
Ինչո՞ւ են ընտրել ԼՂՀ քաղաքները՝ հարցին էլ Գոռ Սարգսյանը պատասխանեց. «Մենք ուզում ենք նպաստել մեր եղբայր պետության զարգացմանը»։
«Սահմանամերձ գյուղական համայնքների առաջնահերթ խնդիրների լուծմանն ուղղված միջոցառումների իրականացում» անվանակարգում դրամաշնորհ շահած «Միասին» երիտասարդական շարժման նախագահ Հակոբ Հակոբյանն «Առաջին լրատվական»-ի հետ զրույցում նշեց, որ գումարը հստակ նշել չի կարող, բայց խոսքը 1-2 միլիոն դրամի մասին է։
Նա նշեց, որ իրենց նախաձեռնության նպատակն է ստարթափներ ստեղծել մարզերում, որտեղ հանրությանը կսովորեցնեն՝ ինչպես հանդես գալ ստարթափով, ինչպես գաղափարից հասնել գործող ստարթափի։ Այսինքն՝ երբ որևէ երիտասարդի համացանցը հնարավորություն է ընձեռում ստեղծել բարիք՝ անկախ այն հանգամանքից, թե որտեղ ես դու գտնվում։ Նա նշեց, որ աշխարհում հաջողված մեծ ստարթափներ կան։
«Խոսքը այն մասին է, որ երիտասարդներին տրվեն այն հմտությունները, որոնք անհրաժեշտ են իրենց գլխում առաջացած գաղափարը դարձնելու գործող ստարթափ մոդել»,- ասաց նա։
Մեր այն դիտարկմանը՝ սահմանամերձ համայնքներում արդյոք սա՞ է առաջնայինը երիտասարդների շրջանում, նա նշեց, որ սահմանամերձ գյուղական համայնքներում առաջնային նպատակն այն է, որ այնտեղ ապրող երիտասարդը հասկանա, որ իրեն պետք չէ գնալ իր գյուղից, որպեսզի ինքն ունենա հաջողություններ։
«Մեր նպատակն է գործնականում ցույց տալ, որ, այո, հնարավոր է մնալ հենց իրենց բնակավայրում, համայնքում և հաղորդակից ու մասնակից լինել համաշխարհային գործընթացներին։ Այսինքն՝ ստեղծելով սեփական «արտադրանքը»՝ դառնալ դրանց մասնակիցը»,- ասաց նա։ Սա այս կառույցի առաջին դրամաշնորհն է։
Ի դեպ, այս դրամաշնորհի շրջանակներում հնարավոր է ԼՂՀ տարածքում իրականացնեն իրենց ծրագրերը՝ ըստ նպատակահարմարության։
