Վենեսուելայի իշխանությունները մտադիր են սկսել Ուգո Չավեսի հնարավոր թունավորման վարկածի պաշտոնական հետաքննությունը՝ հայտարարել է երկրի նախագահի պաշտոնակատար Նիկոլաս Մադուրոն տեղի Telesur հեռուստաալիքին տված հարցազրույցում:
Մադուրոյի խոսքով՝ հենց թունավորումն է դարձել Չավեսի մոտ քաղցկեղի արագ զարգացման ու նրա մահվան պատճառը՝ հայտնում է Interfax-ը:
«Մենք կպարզենք ճշմարտությունը: Ինտուիցիան մեզ հուշում է, որ մեր կոմանդանտե Չավեսը թունավորվել է մութ ուժերի կողմից, որոնք ցանկացել են շեղել նրան ճշմարիտ ուղուց»,- հայտարարել էր Մադուրոն:
Չավեսի քաղաքականության հակառակորդները նախագահի թունավորման լուրերը համարում են իշխանության՝ ժողովրդի մեջ իմպերիալիստական պետությունների դավադրության նկատմամբ հավատը ամրապնդելու ցանկություն:
