Անկախ փորձագետ Հայկ Բալանյանը պատասխանելով «Առաջին լրատվական»-ի հարցերին՝ ի՞նչ կարող է տալ հացադուլը, պատմության մեջ որևէ ընդդիմադիր գործիչ կարողացե՞լ է արդյոք որևէ բանի հասնել պայքարի այդ միջոցն ընտրելով, ասաց. «Ո՛չ, հացադուլը կարող է ապահովել միայն, այսպես կոչված, բարոյական հաղթանակ և հացադուլավորի որոշակի իմիջ:
Հացադուլի դիմել է, օրինակ, Գանդին, սակայն Գանդիի պարագայում հաջողության գրավականը միլիոնավոր հետնորդներն էին և կուռ կառույցը, որը միավորեց բազմալեզու և բազմակրոն ազգին, որոնց համար առաջնորդի անձնազոհությունը ոգևորող և միավորող հանգամանք էր: Այդ իմաստով հաջողությունը պայմանավորված չէր հացադուլով, այլ ավելի շատ լիդերության հաստատման և ամրապնդման քայլ էր»:
Նա նշեց, որ Րաֆֆի Հովհաննիսյանի դեպքում սա անգամ շանտաժ էլ չէ. «Դա ավելի շատ ինքնազոհողության միջոցով մարդկանց ոգևորելու, մոբիլիզացնելու միջոց է, մասամբ էլ՝ փակուղում հայտնվելու գիտակցություն: Նաև՝ անձնական զոհողությամբ անվճռականության կամ սխալ հաշվարկի մեջ չմեղադրվելու ցանկություն»:
Խոսելով այն մասին, թե արդյոք այս հուսահատ և ծայրահեղ քայլը չի՞ հիասթափեցնի հասարակությանը և այն ընտրազանգվածին, որ իրեն ձայն է տվել և այսօր պայքարելու ոգով Ազատության հրապարակում է, փորձագետը կարծիք հայտնեց, որ մեր հասարակությունը չի տպավորվի հացադուլից, նույնիսկ եթե որևէ մեկը ինքնահրկիզվի, արձագանք, միևնույն է, չի լինի. «Իսկ այ, եթե, օրինակ, ընդդիմադիր անձանց կողմից որևէ իշխանավոր սպանվի քաղաքական դրդապատճառներով, այ, այդ դեպքում իրավիճակը կտրուկ կսրվի»:
