ԱՄՆ Հետախուզությունը կարծում է, որ Ռուսաստանի հետ բարդ կլինի Սիրիայի հարցի շուրջ պայմանավորվելը,- ասվում է ԱՄՆ Ազգային հետախուզության ղեկավար Ջեյմս Կլեպերի՝ անվտանգության միջազգային սպառնալիքների գնահատման վերաբերյալ Կոնգրեսին ուղղված ամենամյա զեկույցում: Այս մասին հայտնում է RIA Novosti-ն:
«Ինչ վերաբերում է Սիրիային, Ռուսաստանը, ամենայն հավանականությամբ, կմնա բարդ զրուցակից»,- ասվում է զեկույցում: Այն կազմողների կարծիքով՝ Մոսկվան նախկինի պես կենտրոնացած կլինի Սիրիայում ռազմական ներխուժման կանխման վրա:
Փաստաթղթում նաև ասվում է, որ Մոսկվան անհանգստացած է լիբիական նախադեպով և կարծում է, որ Արևմուտքը իրականացնում է ռեժիմի փոխման անխոհեմ քաղաքականություն, որն ապակայունացնում է տարածաշրջանը:
«Որպես իրենց ճշմարտացիությունը հաստատող փաստարկներ՝ ռուսները մատնանշում են Եգիպտոսում «Մուսուլման-եղբայրներ»-ի վերելքը և անցած տարվա սեպտեմբերին Լիբիայում ամերիկացի դիվանագետների դեմ իրականացված ահաբեկչությունները»,- նշվում է փաստաթղթում:
