Մադրիդի «Ռեալ»-ի գլխավոր մարզիչ Ռաֆայել Բենիտեսը հերքել է շրջանառվող լուրերն այն մասին, որ տարաձայնություններ ունի թիմի առաջատար Քրիշտիանու Ռոնալդուի հետ:
«Աշխատելով Քրիշտիանուի հետ, հասկանում ես, թե որքան է նա սիրում հաղթել և թե ինչու է աշխարհի լավագույն ֆուտբոլիստը համարվում: Կցանկանայի, որպեսզի ամբողջ թիմը հաղթանակի նույնքան մեծ ցանկություն ու ձգտում ունենա, որքան Ռոնալդուն: Քրիշտիանուի հետ հիանալի հարաբերություններ ունեմ: Այնպես, ինչպես թիմի մյուս ֆուտբոլիստների հետ: Նրանցից յուրաքանչյուրի հետ հաճախ եմ շփվում: Իհարկե, բազմաթիվ լուրեր են շրջանառվում: Բայց վստահեցնում եմ ձեզ, որ որևէ կոնֆլիկտ չկա: Նորմալ հարաբերություններ ունենք:
Ասեմ, թե ինչն է փոխվել, որ Քրիշտիանուին աշխարհի լավագույն ֆուտբոլիստն անվանեցի: Հետևելով նրան մարզումների ժամանակ, հասկանում ես, թե ինչու նա այդքան շատ տիտղոսներ ունի: Ակնհայտ է դառնում, որ Ռոնալդուն աշխարհի լավագույն ֆուտբոլիստն է»,- AS-ը մեջբերում է Բենիտեսի խոսքերը:
