Ադրբեջանական Salam News լրատվական գործակալության փոխանցմամբ, հրապարակվել են բոլոր ժամանակներում Ադրբեջանից արտահանված նավթի ու բնական գազի ցուցանիշները:
Ադրբեջանի պետական նավթային ընկերության (SOCAR) առաջին փոխնախագահ Հոշբահթ Յուսիֆզադեի խոսքերով, Ադրբեջանը ցայժմ համաշխարհային շուկաներ է առաքել 255 միլիոն տոննա նավթ:
2011 թվականի մարտի 1-ի դրությամբ, Ադրբեջանը «Բաքու-Թբիլիսի-Ջեյհան» (ԲԹՋ) նավթամուղով արտահանել է 150 միլիոն տոննա նավթ, «Բաքու-Սուփսա» (Վրաստան) նավթամուղով` 55 միլիոն տոննա նավթ, իսկ ահա «Բաքու-Նովոռոսիյսկ» նավթամուղով` ընդամենը 33 միլիոն տոննա նավթ: Բացի այդ, երկաթուղային ճանապարհով առաքվել է 17.7 միլիոն տոննա նավթ
Միևնույն ժամանակահատվածում Ադրբեջանն արտահանել է 22.2 միլիարդ խորանարդ մետր բնական գազ, որից 17.5 միլիարդ խորանարդ մետրը բաժին է ընկել «Բաքու-Թբիլիսի-Էրզրում» (ԲԹԷ) գազատարին, 1.1 միլիարդ խորանարդ մետրը` իրանական ուղղությանը, իսկ 3.6 միլիարդ խորանարդ մետրը` ռուսական ուղղությանը:
Հիշեցնենք, որ Ադրբեջանի նավթային պաշարները գնահատվում են 30 միլիարդ բարել (1 բարելը հավասար է 159 լիտրի), իսկ գազային պաշարները` 5-6 տրիլիոն խորանարդ մետր: