«Երբ հայտարարեցին, որ «Հազարամյակի մարտահրավերներ» ծրագրում ենք ընդգրկվել, բոլորը էյֆորիայի մեջ էին: Հիմա ուզում են համոզել, որ փակելը սովորական երևույ թ է»,- խոսելով ամերիկյան «Հազարամյակի մարտահրավերներ» ծրագրում Հայաստանի մասնակցության արգելման մասին`ասաց վերլուծաբան Անուշ Սեդրակյանը` նման արձագանքը անտրամաբանական համարելով:
Ըստ նրա`սա լուրջ հաղորդագրություն է մեր իշխանությանը: ««Հազարամյակի մարտահրավերներում» Հայաստանի մասնակցությունը կասեցնելը ազդանշան է Հայաստանի իշխանությանը այն մասին, որ դուք դուրս եք մնում, չեք համապատասխանում մեր ստանդարտներին և չեք կարող մաս կազմել ստեղծվող մեծ, գլոբալ, հավասարազոր համագործակցության ցանցին»,- մեկնաբանեց Անուշ Սեդրակյանը:
Հղում անելով ԱՄՆ դեսպան Մարի Յովանովիչի հայտարարությանը` վերլուծաբանը նշեց, որ «Հազարամյակի մարտահրավերներ» ծրագրին Հայաստանի մասնակցության կասեցման պատճառը նախ ֆինանսավորման վերահսկման խնդիրն է, և միայն երկրորդ հերթին` քաղաքական պատճառները:
«Մեզ տրամադրելիք գումարը այժմ ԱՄՆ կառավարությունը տալու է Վրաստանին, քանի որ Վրաստանը ներկայացրել է ԱՄՆ ֆինանսավորմամբ իրականացված աշխատանքների հաշվետվություն և ցույց է տվել առաջընթաց մարդու իրավունքների պահպանման, կոռուպցիայի դեմ պայքարի հարցում»,- ասաց վերլուծաբանը: