ԱՄՆ-ն բանակցություններ չի անցկացնում «Թալիբան» շարժման ներկայացուցիչների հետ,- ասել է Պենտագոնի ղեկավար Չակ Հեյգելը՝ հերքելով կիրակի Աֆղանստանի նախագահ Համիդ Կարզայի հնչեցրած հայտարարությունը: Այս մասին հայտնում է «Վզգլյադը»:
«Ես նախագահին ասել եմ՝ ճիշտ չէ, որ ԱՄՆ-ն միակողմանիորեն աշխատում է թալիբների հետ և փորձում պայմանավորվել ինչ-որ հարցերի շուրջ: Փաստն այն է, որ խաղաղության ձեռքբերման կամ քաղաքական կարգավորման ցանկացած ջանքերի գլուխ պետք է կանգնեն աֆղանները»,- հայտարարել է կարճատև այցով Քաբուլում գտնվող Հեյգելը:
Այն մասին, որ ԱՄՆ-ն իբր թե վերսկսել է անցած տարի ընդհատված բանակցությունները «Թալիբան» արմատական շարժման հետ, Կարզայը հայտարարել էր Քաբուլում Հեյգելի հետ հանդիպումից քիչ առաջ:
Համաձայն Կարզայի հայտարարության՝ բանակցություններն անցկացվում են Կատարում կանոնավոր կերպով՝ ամեն օր: Թալիբների ներկայացուցիչ Զաբիհուլա Մուջահիդը նույնպես հերքել է այդ հայտարարությունը:
Նշեք, որ Հեյգելն Աֆղանստանում է՝ ավելի լավ հասկանալու և անձամբ գնահատական տալու երկրում տիրող իրադրությանը և լսելու հրամանատարներին: Նա հանդիպել է Աֆղանստանում անվտանգության աջակցման միջազգային ուժերի հրամանատարության հետ, այցելել Ջալալաբադի և Բահրամի ռազմաբազաներ:
