Տեղեկություններն այն մասին, որ ԱՄՆ-ի և թալիբների միջև բանակցությունները վերսկսվել են, իրականությանը չեն համապատասխանում։ Այս մասին այսօր լրագրողներին հայտնել է ամերիկյան վարչակազմի ներկայացուցիչը։
Նրա խոսքերով՝ ԱՄՆ կառավարությունը պահպանում է իր հավատարմությունն Աֆղանստանում քաղաքական հաշտության գործընթացին, որը ենթադրում է թալիբների հետ բանակցությունների վարում։ Սակայն, Վաշինգտոնը համարում է, որ այս հարցում առաջընթացը մեծապես կախված է Աֆղանստանի իշխանությունների և «Թալիբան»-ի միջև պայմանավորվածությունների ձեռք բերումից։
Այն մասին, որ ԱՄՆ-ն իբր վերսկսել է «Թալիբան» շարժման հետ մեկ տարի առաջ ընդհատված բանակցությունները, ավելի վաղ հայտարարել էր Աֆղանստանի նախագահ Համիդ Քարզայը։
ԱՄՆ-Ն ու Աֆղանստանը բազմիցս են հայտարարել, որ մտադիր են հասնել «Թալիբան»-ի հետ հաշտեցման, որը զինված պայքարից և ահաբեկչական գործողություններից հրաժարվելու դեպքում կարող է մասնակցել քաղաքական գործընթացներին աֆղանական տարածքում։ Սակայն թալիբները չեն ցանկանում ընդունել Աֆղանստանի այժմյան իշխանություններին՝ նրանց համարելով ամերիկյան դրածոներ։
Բացի այս, Քարզայը հանդես է եկել Վաշինգտոնի հասցեին հերթական մեղադրանքներով։ Նրա խոսքերով՝ ԱՄՆ–ը փաստորեն համագործակցում է թալիբների հետ, երբ երկրի բնակչությանը հավաստիացնում է, որ 2014 թ. իր զորքերի դուրս բերումից հետո իրավիճակն ավելի կվատանա։
ԻՍԱՖ-ի (Աֆղանստանում անվտանգության աջակցության միջազգային ուժեր) հրամանատար, ամերիկացի գեներալ Ջոզեֆ Դանֆորդը կտրականապես հերքել է Քարզայի մեղադրանքները։ «Մենք չափազանց լարված ենք պայքարել վերջին 12 տարիների ընթացքում, մենք չափազանց շատ արյուն ենք թափել, որպեսզի ենթադրություններ արվեն, որ բռնությունն ու անկայունությունը մեզ համար շահավետ է»,- ասել է նա։
