Բազմաթիվ վնասվածքներ ստացած պրոֆեսիոնալ կասկադյոր Մայք Գաբոֆը դատական հայց է ներկայացրել հոլիվուդյան երեք կինոստուդիաների դեմ, որոնք վտանգավոր հնարք են նկարահանել իր մասնակցությամբ «Թափանցիկ ավտովազորդը. վրիժառության ոգին» ֆիլմի DVD-հրատարակոււթյան համար, որի գլխավոր դերում հանդես է գալիս Նիկոլաս Քեյջը: Այս մասին հայտնում է TMZ պորտալը:
Հայցը տարածվում է ֆիլմի համար պատասխանատու երեք՝ Sony Pictures, Break Point Media և Next Point Inc ընկերությունների վրա: Համաձայն դատական նյութերի՝ Գաբոֆը վարձվել է 2012-ի ապրիլին, իր խոսքով, վտանգավոր հնարքի կատարման համար: Նա պնդում է, որ ղեկավարությունը, իմանալով կասկադյորի համար մեծ ռիսկի մասին, անփութություն է դրսևորել անվտանգության անհրաժեշտ միջոցառումների պահպանման հարցում, ինչն էլ հնարքի ձախողման ժամանակ հանգեցրել է տրավմաների:
Հրկիզվող կասկադյորը պետք է մոտոցիկլետով հաղթահարեր թեք լանջը, թռչեր լճի վրա ու վայրէջք կատարեր ջրում, սակայն կասկադյորի մոտոցիկլետը վայրէջք է կատարել գետնին: Բժիշկների խոսքով՝ նրա բախտը բերել է, որ ողջ է մնացել: Նա լուրջ կոտրվածքներ ու այրվածքներ ունի: Երկամսյա հիվանդանոցային բուժումը նրա վրա ավելի քան 1 մլն դոլար է նստել:
Դեռևս հայտնի չէ, թե որքան գումար է Գաբոֆը մտադիր պահանջել կինոընկերություններից: Break Point Media-ի ներկայացուցիչը հայտնել է, որ հայցային պահանջը միանգամայն անարդարացի է, քանի որ նա կինոընկերությունների կողմից վարձվել է որպես երրորդ կողմ և կրել հնարքի կատարման ողջ պատասխանատվությունը: