Միջազգային գործընկերություն հանուն մարդու իրավունքների (ՄԳՄԻ) կազմակերպությունը զեկույց է հրապարակել, որը փաստագրում է Երևանում էլեկտրաէներգիայի սակագնի աճի դեմ բողոքի խաղաղ ցույցի նկատմամբ հունիսի 23-ին ուժի կիրառումը:
«Ազատության» փոխանցմամբ՝ զեկույցի հիմքում ընկած փաստերը ձեռք են բերվել ՄԳՄԻ-ի փաստահավաք խմբի աշխատանքների արդյունքում: Առաքելությունը Երևանում է եղել հունիսի 24-29-ը։
«#ElectricYerevan. Ուժի կիրառումը խաղաղ ցույցի դեմ» վերնագրված զեկույցը հանգամանալից հետազոտում է ոստիկանության կողմից էլեկտրաէներգիայի սակագնի աճի դեմ խաղաղ հավաքի հարկադիր ցրումը՝ ջրանետի միջոցով, ինչպես նաև՝ ցուցարարներին զանգվածաբար ձերբակալելով: Այն շեշտադրում է ցուցարարների և լրագրողների նկատմամբ ֆիզիկական ոտնձգությունները՝ և՛ համազգեստավոր, և՛ քաղաքացիական հագուստով ոստիկանների կողմից: Զեկույցը ներառում է նաև իրադարձությունների իրավական գնահատական՝ ազգային և միջազգային իրավական նորմերի համապատկերում, և Հայաստանի իշխանություններին ուղղված ռեկոմենդացիաներ՝ արձանագրված մարդու իրավունքների խախտումների դեպքերով ապահովել հաշվետվողականություն»,- ասված է կազմակերպության հաղորդագրությունում։
Առաքելության զեկույցը ներկայացվել և քննարկվել է «#ElectricYerevan. Հայաստանում հավաքների ազատության և քաղաքացիական մշակույթի դասերը» վերտառությամբ միջոցառմանը, որը կազմակերպվել էր Բրյուսելում՝ ՄԳՄԻ-ի և Բաց հասարակության եվրոպական քաղաքականության ինստիտուտի կողմից։
ՄԳՄԻ ներկայացուցիչ Սիմոն Պապուաշվիլին, ով համակարգել է Երևանում փաստահավաք առաքելության աշխատանքները, ասել է.- «Ակնհայտ է, որ ոստիկանությունը Երևանում անհամաչափ ուժ է կիրառել՝ այդպիսի կոշտ միջոցներ կիրառելու համար պատճառ չունենալով, քանի որ հավաքը միանգամայն խաղաղ էր»:
Նա ընդգծել է, որ Հայաստանի իշխանությունները պետք է պատասխանատվության ենթարկեն խաղաղ ցուցարարների նկատմամբ բռնությունների պատասխանատուներին և ապահովեն, որ նրանց նկատմամբ կիրառված պատժամիջոցները համաչափ լինեն գործած բռնությունների խստությանը:
