Ամերիկայի Միչիգան նահանգի դպրոցի տնօրենը երրորդ դասարանցի երեխայից վերցրել է խաղալիք զինվորիկները, որոնցով նրա մայրը զարդարել էր նրա ծննդյան օրվա առիթով պատրաստած կարկանդակները, հայտնում է The Daily Mail-ը:
Դպրոցական Հանթեր Ֆաունթինից վերցված խաղալիքները տնօրենը վերադարձրել է նրա ծնողներին: Նա ասել է, որ խաղալիք զինվորիկները երեխաների շրջանում բռնություն են քարոզում, և դրանք որպես կարկանդակների զարդ օգտագործելը նվազագույնը ոչ կոռեկտ է վերջերս «Սենդի Հուկ» դպրոցում սպանությունների ֆոնին:
Ուսումնական հաստատության ներկայացուցիչները նաև նշել են, որ ներկայումս որոշ ամերիկացիներ սկզբունքորեն հրաժարվում են երեխաների համար խաղալիք զենք և զինվորիկներ գնել: Ուստի դպրոցը չի կարող թույլ տալ այդպիսի նվերներ անել համադասարանցիներին՝ ելնելով այդ ծնողների հայացքների նկատմամբ հարգանքից:
Երեխայի հայրը՝ Քեյսի Ֆաունթինը համաձայն չէ դպրոցի դիրքորոշման հետ: Նրա խոսքով՝ թխվածքները զարդարող խաղալիքները պատկերել են Երկրորդ համաշխարհային պատերազմի ժամանակվա ամերիկյան բանակի զինվորներին:
«Սենդի Հուկ» դպրոցում դեպքը տեղի է ունեցել 2012-ի դեկտեմբերի 14-ին: 20-ամյա Ադամ Լենզան սպանել է 20 երեխայի և 6 մեծահասակի, հետո ինքնասպան եղել: