Թուրքական Anadolu լրատվական գործակալության փոխանցմամբ՝ «Արդարություն և զարգացում» կուսակցության (ԱԶԿ) նախագահ Ահմեթ Դավութօղլուն այսօր սկսել է կոալիցիոն կառավարություն ձևավորելու ուղղությամբ առաջին քայլերը։ Սրանից առաջ Թուրքիայի նախագահ Ռեջեփ Էրդողանը Դավութօղլուին հանձնարարել էր ձևավորել կոալիցիոն կառավարություն։
Դավութօղլուն էլ որոշել է տվյալ ուղղությամբ առաջինը հանդիպել «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուի հետ։ Հանդիպումը տեղի է ունեցել Անկարայում գտնվող ԺՀԿ կենտրոնական գրասենյակում։ Դավութօղլուից բացի, հանդիպմանը մասնակցել են նաև ԱԶԿ-ի այլ ներկայացուցիչներ՝ փոխվարչապետ Նուման Քուրթուլմուշը, մշակույթի ու զբոսաշրջության նախարար Օմեր Չելիքը, զարգացման նախարար Ջևդեթ Յըլմազը և Ստամբուլից ընտրված պատգամավոր Այշե Նուր Բահչեքափըլըն։ ԺՀԿ-ից հանդիպմանը, Քըլըչդարօղլուից բացի, մասնակցել են կուսակցության փոխնախագահներ Հալուք Քոչը, Սելին Սայեք Բյոքեն, Ֆաիք Օզթրաքը և Ստամբուլից ընտրված պատգամավոր Աքիֆ Համզաչեբին։ Հանդիպումն անցել է դռնփակ պայմաններում։
Պլանավորված է, որ հանդիպումից հետո Դավութօղլուն մամուլի ասուլիս կտա ԱԶԿ-ի կենտրոնական գրասենյակում։ Կոալիցիոն կառավարություն ձևավորելու շրջանակներում Դավութօղլուն վաղը հանդիպելու է «Ազգայնական շարժում» կուսակցության (ԱՇԿ) ղեկավար Դևլեթ Բահչելիի, իսկ չորեքշաբթի՝ քրդամետ «Ժողովուրդների դեմոկրատական» կուսակցության (ԺԴԿ) համանախագահներ Սելահաթթին Դեմիրթաշի ու Ֆիգեն Յուքսեքդաղի հետ։
Լրատվամիջոցն ընդգծում է, որ Թուրքիայում կառավարություն ձևավորելու համար կոալիցիոն հանդիպումներ անցկացվում են վերջին 16 տարում առաջին անգամ։ Վերջին անգամ դրանք անցկացվել են 1999 թվականի ապրիլի 18-ին Թուրքիայում անցկացված խորհրդարանական ընտրություններից հետո։
