Համաշխարհային տնտեսական ֆորումը օրերս հրապարակել էր «Համաշխարհային տեղեկատվական տեխնոլոգիաներ 2010-2011» զեկույցը, որտեղ ցանցային պատրաստվածության ցուցիչով Հայաստանը 138 երկրների շարքում 109-րդ տեղում էր` նախորդ տարվա համեմատ 8 տեղով հետ ընկնելով: ԱՊՀ երկրներից ՀՀ-ից հետ են միայն Տաջիկստանը (112-րդ տեղ) և Ղրղզստանը (116-րդ տեղ): Ադրբեջանը 70-րդ տեղում է, Թուրքիան` 71-րդ, Վրաստանը` 98-րդ, իսկ Իրանը` 101-րդ: Հայաստանից առաջ են նաև Պակիստանը (88), Գվատեմալան (94), Զամբիան (102), Հոնդուրասը (103) Նիգերիան (104), Մոզամբիկը (106), Ուգանդան (107), Էկվադորը (108):
Անդրադառնալով այս զեկույցին` «Սինոփսիս Արմենիա» ՓԲԸ տնօրեն Հովիկ Մուսայելյանը այսօր ասաց, թե ինքը չի կարծում, որ ցանցային պատրաստվածությամբ Հայաստանը այսքան հետ է: «Իմ խորին համոզմամբ, Հայաստանի իրական տեղը 70-ից 80-րդ տեղերում է: Բայց սա չի նշանակում, թե օբյեկտիվ հետազոտություն չի արվում, որովհետև բավական մեծ հեղինակություն ունեցող փորձագետներ են պատրաստում այդ զեկույցը: Այստեղ ներգրավված են և՛ անհատները, և՛ մասնավոր հատվածը, և՛ կառավարությունը` հարցադրումների պատասխանների առումով: Նման պատկերը, կարծում եմ, արդյունք է նրա, որ մեզ մոտ տիրում է համընդհանուր նիհիլիզմ: Կառավարությունը էլեկտրոնային կառավարման առումով բավական հետաքրքիր ծրագրեր է իրականացրել: Բայց դրանք մասնավորի և անհատների կողմից չեն օգտագործվում, որովհետև հասարակության մեջ վստահություն չկա»,- ասաց Հ. Մուսայելյանը:
Նրա խոսքով այս զեկույցը պատրաստելիս մասնավոր ընկերություններին և անհատներին հարցումներ են արվում երկրում ընդհանուր տնտեսական վիճակի, մրցակցության մասին և այլն: «Պարզ է, թե ինչ պատասխաններ են հիմնականում հնչելու: Օրինակ՝ Հայաստանը աշխարհի 10 երկրներից մեկն էր, որ նախորդ տարի կիրառեց 4G տեխնոլոգիան: Սինոփսիսում այսօր կիրառվում են ամենաարդիական ավտոմատ նախագծման տեխնոլոգիաները: Կարծում եք՝ այդ զեկույցում սրանք հաշվի առնվա՞ծ են: Ո՛չ, հաշվի առնված չեն, ուղղակի հարցերի բնույթն է ուրիշ»,- ասաց Հ. Մուսայելյանը:
«Ի՞նչ եք կարծում, Ադրբեջանի ՏՏ ոլորտի տնտեսվարող սուբյեկտի ղեկավարը հարցերին օբյեկտիվորեն կպատասխանի՞` կառավարությանը քննադատելով: Ո՛չ, իհարկե, իսկ ՀՀ-ում այդ խնդիրը չկա: Չեմ կարծում, թե Հայաստանը այսօր Մոզամբիկի չափ զարգացածություն ունի ցանցային պատրաստվածությամբ»,- հավելեց «Սինոփսիս Արմենիա» ՓԲԸ-ի տնօրենը: