Microsoft ընկերությունը ներկայացրել է ծրագիր՝ ուղղված Hololens «հոլոգրաֆիկ» ակնոցի կիրառության ոլորտների ուսումնասիրությանը։ Այս մասին հայտնում է hitech.vesti.ru-ն: Դրան մասնակցելու համար հրավիրվում են ԱՄՆ-ում տեղակայված համալսարանները, գիտահետազոտական ինստիտուտները և ոչ կոմերցիոն կազմակերպությունները: Սուբսիդիաների ընդհանուր ծավալը կկազմի կես մլն դոլար:
Մրցույթի մասնակիցները կկարողանան հավակնել 100 հազարական դոլարի 5 գրանտներից մեկին: Նրանց նաև կբաժանեն ապագայի սարքի երկուական հավաքածու: Հայտերի ընդունումը կավարտվի սեպտեմբերի 5-ին, հաղթողների անունները հայտնի կդառնան հոկտեմբերի 6-ին:
HoloLens-ը ներկայացվել է հունվարի վերջին Windows 10 օպերացիոն համակարգի հետ: Դրանք նախատեսված են Windows Holographic «հոլոգրամների»՝ իրական աշխարհին հյուսված վիրտուալ օբյեկտների դիտման համար: Սարքն ունի սեփական պրոցեսոր, գրաֆիկական չիպ, ակուստիկ համակարգ և մի շարք հաղորդիչներ. դրան հաղորդալարեր կամ համակարգիչ պետք չեն:
Այդ սարքը կարող է շատ կիրառություններ ունենալ: Դնելով ակնոցը՝ օգտատերը կարող է տեսնել, օրինակ, օդում «լողացող» Skype-ի զրուցակցին, եղանակի տեսությունը կամ ֆուտբոլի խաղի հեռարձակմամբ վիրտուալ հեռուստացույց:
