HSBC բանկային խումբը հայտարարել է 6 աշխատակցի հեռացնելու մասին՝ ԴԱԻՇ-ի (Իրաքի և Շամի իսլամական պետություն) հոլովակները ծաղրող տեսանյութի համար: Այս մասին հայտնում է BBC-ի ռուսական ծառայությունը:
Տեսանյութում երևում է նարնջագույն կոմբինիզոնով մարդ՝ ծնկած, բալակալավայով 5 մարդկանցով շրջապատված: «Ալլահը մեծ է»,- ասում է նրանցից մեկը՝ նմանակելով արաբական ակցենտը: Կադրից դուրս լսվում են ծիծաղ և ծաղր: Տեսանյութն ավարտվում է նարնջագույն կոմբինիզոնով մարդու «գլխատումով»:
7-վայրկյանանոց հոլովակը հրապարակվել է Instagram-ում, հետո ջնջվել է, սակայն այն հասցրել են նկատել Sun թերթի լրագրողները: Երբ լրագրողները հոլովակը ցույց են տվել բանկի ներկայացուցիչներին, արձագանքը չի ուշացել:
«Երբ մենք տեսանք Sun-ի հրապարակած այդ զզվելի տեսանյութը, մենք որոշեցինք դրան առնչվող բոլոր մարդկանց հեռացնել: Մենք ներողություն ենք խնդրում, եթե հոլովակը որևէ մեկին վիրավորել է»,- թվիթերյան պաշտոնական էջում հայտարարել է HSBC խումբը:
