Հայ ազգային կոնգրեսը երեկ հաղորդագրություն է տարածել այն մասին, որ մարտի 5-ին տեղի է ունեցել ՀԱԿ կուսակցության նախաձեռնող խմբի հերթական հավաքը, որի ժամանակ քննարկվել են ՀԱԿ կուսակցության հիմնադիր համագումարի նախապատրաստման հետ կապված հարցեր, նաև որոշվել են համագումարի նախապատրաստման կազմկոմիտեի անդամների անունները: Բնականաբար, այդ ցուցակը գլխավորում է Աժ ՀԱԿ խմբակցության ղեկավար Լևոն Զուրաբյանը:
Ըստ «Ժողովուրդ»-ի՝ ՀԱԿ այս հաղորդագրությունը, մեղմ ասած, տարօրինակ է այն առումով, որ փետրվարի 23-ի ՀՀՇ արտահերթ համագումարում որոշում կայացվեց ՀՀՇ-ն վերանվանել «Հայ ազգային կոնգրես» կուսակցության: Ասել է թե՝ արդեն կա ՀԱԿ կուսակցություն, մնում է՝ ՀՀ ԱՆ պետական ռեգիստրում գրանցման փաստաթղթերը վերջնականապես պաշտոնապես ամրագրվեն: Ու այսքանից հետո անհասկանալի է, թե էլ ինչ նոր հիմնադիր համագումար է անցկացնելու ՀԱԿ-ը, ինչ կազմկոմիտե է ձևավորվում, մանավանդ որ ՀԱԿ վերանվանված ՀՀՇ-ն շարունակում է գործել նույն կազմով ասել է թե՝ համագումար անցկացնելու հարցը այդ կուսակցության վարչության գործն է, այլ ոչ թե Զուրաբյանի նախաձեռնող խմբինը: