Թուրքական Anadolu լրատվական գործակալության փոխանցմամբ՝ Թուրքիայի վարչապետ Ահմեթ Դավութօղլուն պաշտպանության նախարարի պաշտոնում նշանակել է Վեջդի Գյոնուլին: Դավութօղլուն ընդգծել է, որ Վեջդի Գյոնուլը մեծ փորձ ունի այդ պաշտոնում, և որ նախկինում էլ զբաղեցրել է Թուրքիայի պաշտպանության նախարարի պաշտոնը:
Դավութօղլուի խոսքով՝ Գյոնուլն այդ պաշտոնում նշանակվել է երեկ: Վեջդի Գյոնուլը Թուրքիայի պաշտպանության նախարարի պաշտոնում փոխարինել է Իսմեթ Յըլմազին, որն ընտրվել է խորհրդարանի նախագահի պաշտոնում և Թուրքիայի պաշտպանության նախարարի պաշտոնը զբաղեցրել էր 2011 թվականին:
Հիշեցնենք, որ Վեջդի Գյոնուլը Թուրքիայի պաշտպանության նախարարի պաշտոնը զբաղեցրել է 18.11.2002-06.07.2011 ժամանակահատվածում: Ի դեպ, Վեջդի Գյոնուլը նախկինում աչքի է ընկել իր հակահայկական հայտարարություններով:
2008 թվականի նոյեմբերի 10-ին՝ Թուրքիայի Հանրապետության հիմնադիր Մուսթաֆա Քեմալ Աթաթուրքի մահվան 70-ամյակի կապակցությամբ, Թուրքիայի պաշտպանության նախարար Վեջդի Գյոնուլը հայտարարել էր. «Եթե այսօր Էգեյան ծովի շրջանում շարունակեին ապրել հույները, և եթե Թուրքիայի շատ վայրերում շարունակեին ապրել հայերը, արդյոք այսօր մենք կունենայի՞նք նույնպիսի ազգային պետություն»։
