Ռուսաստանի լրագրողները դիմել են երկրի ղեկավարությանը՝ կոչ անելով ավարտին հասցնել «Коммерсант»–ի թղթակից Օլեգ Կաշինի վրա շաբաթ օրը տեղի ունեցած հարձակման հետաքննությունը։ Հետաքննությունը դեռ նախնական տվյալներ չի հրապարակել. Օլեգ Կաշինի գործընկերների և ընկերների կարծիքով, հարձակման պատճառ կարող էին հանդիսանալ թերթում ու բլոգներում նրա սուր ելույթները։
Լրագրողը դաժան ծեծի հետեւանքով հայտնվել է վերակենդանացման բաժանմունքում։ Երեկ նա ենթարկվել է նոր վիրահատությունների։ Երեք ժամ տեւած վիրահատությունից հետո բժիշկները վստահեցրել են, որ լրագրողի ուղեղին ոչինչ չի սպառնում. երեկ, սակայն, Օլեգը դեռ անզգայացած վիճակում էր։
ՌԴ նախագահ Դմիտրի Մեդվեդեւը շաբաթ օրը ՌԴ գլխավոր դատախազ Յուրի Չայկային եւ ՆԳ բախարար Ռաշիդ Նուրգալիևին հանձնարարել էր հատուկ վերահսկողության տակ վերցնել հետաքննությունը եւ ձեռնարկել բոլոր հնարավոր միջոցառումները՝ հարձակման հանգամանքները պարզելու համար։ Իրենց ուղերձում լրատվամիջոցների ներկայացուցիչները կոչ են անում նաև ավարտին հասցնել լրագրողներ Աննա Պոլիտկովսկայայի եւ Միխայիլ Բեկետովի գործերով հետաքննությունները և պատժել այդ հանցագործությունների բոլոր մեղավորներին։ Լրագրողները եւ բլոգերները կիրակի օրը Մոսկվայի ՆԳ պետական վարչության շենքի մոտ հանցագործությունը բացահայտելու պահանջով պիկետներ են անցկացրել՝ կազմելով ուղերձի տեքստը, որի տակ պետք է դրվեին ստորագրություններ։