Eurosport-ը հետաքրքիր վիճակագրական տվյալներ է ներկայացրել այսօր կայանալիք «կլասիկո»-ի նախաշեմին:
Մինչ այժմ մեկ մրցաշրջանում 5 «կլասիկո» միայն մեկ անգամ է եղել` 1982/83 մրցաշրջանում. երկու հանդիպում` Իսպանիայի առաջնությունում, մեկ` հանդիպում Արքայի գավաթի խաղարկությունում և երկու հանդիպում` Լիգայի գավաթի խաղարկությունում:
18 օրում 4 «կլասիկո»-ն բացարձակ ռեկորդ է: 1916 թ. մարտ-ապրիլ ամիսներին 20 օրում էր 4 հանդիպում եղել` բոլորն էլ Արքայի գավաթի խաղարկությունում: Առաջին խաղն ավարտվել էր կատալոնացիների հաղթանակով` 2:1 հաշվով, պատասխան խաղում «Ռեալ»-ն առավելության էր հասել 4:1 հաշվով: Մրցակարգի համաձայն` նշանակվել էր վերախաղարկում, որն ավարտվել էր 6:6 հաշվով: Եվ միայն չորրորդ խաղում «արքայական» ակումբը կարողացել է հաղթել 4:2 հաշվով ու դուրս գալ եզրափակիչ, որտեղ խոշոր` 0:4 հաշվով զիջել էր Բիլբաոյի «Ատլետիկ»-ին:
Իսպանիայի առաջնության շրջանակներում այս հանդիպումն 81-րդն է, որը կայանալու է Մադրիդում, և «Ռեալ»-ը շոշափելի առավելություն ունի` 50 հաղթանակ, 14 ոչ-ոքի, 16 պարտություն: Եթե հաշվի առնենք նաև «Նոու Քամփ»-ում կայացած խաղերը, ապա մադրիդցիների հաշվին կլինի 68 հաղթանակ, 30 ոչ-ոքի, 63 պարտություն:
«Բարսելոնա»-ն հաղթել է վերջին 5 «կլասիկո»-ներում, սակայն ռեկորդը պատկանում է «Ռեալ»-ին. 1962-65 թթ. «արքայական» ակումբը 7 անընդմեջ հաղթանակ է տոնել:
Ակումբների ներկայիս առաջատարների վիճակագրությունն ընթացիկ մրցաշրջանում հետևյալն է.
Գոլերի թիվը Իսպանիայի առաջնությունում. Մեսսի` 29, Ռոնալդու` 28:
Գոլային փոխանցումների թիվը Իսպանիայի առաջնությունում. Մեսսի` 18, Ռոնալդու` 8:
Գոլերի քանակը բոլոր մրցաշարերում. Մեսսի` 48, Ռոնալդու` 40:
Անցկացրած պաշտոնական հանդիպումների թիվը. Մեսսի` 46, Ռոնալդու` 45: