Թուրքական Dünya Bülteni լրատվական կենտրոնի փոխանցմամբ` «Ազգայնական շարժում» կուսակցության (ԱՇԿ) առաջնորդ Դևլեթ Բահչելին մերժել է «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուին` նրա արած առաջարկը որակելով որպես «չինական ապրանք»:
Սրանից առաջ Քըլըչդարօղլուն հայտարարել էր, որ պետք է «Արդարություն և զարգացում» կուսակցությանը (ԱԶԿ) դուրս թողնել կոալիցիոն կառավարությունից, և որ ընտրությունների արդյունքներով քվեների մոտ 60 տոկոսը ստացած ընդդիմադիր 3 ուժերը (ներառյալ քրդամետ «Ժողովուրդների դեմոկրատական» կուսակցությունը, ԺԴԿ) պետք է իրենք ձևավորեն կոալիցիոն կառավարություն:
Դրա հետ կապված` Քըլըչդարօղլուն Բահչելիին առաջարկել էր երկրի վարչապետի պաշտոնը: Բահչելին, սակայն, մերժել է դա: Բահչելին հայտարարել է, որ իրենք պատրաստ են «պայմանով այո» ասել «Արդարություն և զարգացում» կուսակցության (ԱԶԿ) հետ կոալիցիա ձևավորելուն, և որ ստեղծված իրավիճակից դուրս գալու համար լավագույն ելք է համարում վաղաժամ խորհրդարանական ընտրություններ անցկացնելը, որը նրա կարծիքով` կարելի է անցկացնել ընթացիկ տարվա նոյեմբերի 15-ին:
Վարչապետի պաշտոնը զբաղեցնելու մասին Քըլըչդարօղլուի հայտարարության հետ կապված` Բահչելին հայտարարել է. «Ի՞նչ է դա, Չինաստանից բերված խաղալիքի տեսա՞կ է»:
ԱՇԿ փոխնախագահ Սեմիհ Յալչընն իր հերթին հայտարարել է, որ Քըլըչդարօղլուի արած առաջարկն իրենք որակում են որպես «քաղաքական կաշառք»:
