Թուրքական Anadolu գործակալության փոխանցմամբ, պաշտոնական Անկարան ձեռնամուխ է եղել Ֆրանսիայի Սենատի օրակարգում Հայոց ցեղասպանության հերքումը քրեականացնող բանաձևի ընդգրկման կանխմանը:
Այդ նպատակով մի շարք նամակներ են ուղարկվել ֆրանսիացի պաշտոնյաներին, որոնցում կոչ է արվում հակազդել բանաձևի ընդունմանը:
Նամակներում նշված է. «Օրինագծի ընդունումը մնայուն վնաս կհասցնի թուրք-ֆրանսիական հարաբերություններին»:
Այդպիսի բովանդակությամբ նամակներ իրենց ֆրանսիացի գործընկերներին հղել են արտգործնախարար Ահմեդ Դավութօղլուն, Թուրքիայի Ազգային մեծ ժողովի (ԹԱՄԺ) նախագահ Մեհմեթ Ալի Շահինը, Թուրք-ֆրանսիական խորհրդարանական բարեկամության խմբի նախագահ Յաշար Յաքըշը և թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) առաջնորդ Քեմալ Քըլըչդարօղլուն:
Հիշեցնենք, որ Ֆրանսիայի Սոցիալիստական կուսակցությունը մտադիր է մայիսի 4-ին Սենատի օրակարգ մտցնել Հայոց ցեղասպանության մերժումը քրեորեն դատապարտող մի օրինագիծ:
Վերջինիս հաստատման դեպքում Ֆրանսիայում Հայոց ցեղասպանությունը ժխտողները կստանան մինչև 5 տարվա ազատազրկում ու կվճարեն 45,000 եվրո տուգանք:
Ֆրանսիայում Հայոց ցեղասպանությունը ճանաչող բանաձևեր ընդունվել են 1998, 2000 և 2001 թվականներին: Իսկ 2006 թվականի հոկտեմբերի 12-ին Ֆրանսիայի խորհրդարանի Ստորին պալատն ընդունեց (Հոլոքոսթի նման) Հայոց ցեղասպանությունը մերժողներին պատասխանատվության ենթարկելու օրինագիծը, որը ցայժմ չի վավերացվել Սենատի կողմից:
