Քանաքեռ-Զեյթուն վարչական շրջանի Խնամակալության և հոգաբարձության բաժնի կողմից հրավիրված աշխատանքային խումբը 2-ամյա Ալենի մոր Նարինե Հարությունյանի գործով երեկ կրկին նիստ էր հրավիրել:
Հիշեցնենք, որ նախորդ նիստի ժամանակ երեխայի մորը 3 օր ժամանակ էր տրվել՝ մայրական պարտականությունները պատշաճ կատարելու և կյանքը վերանայելու համար: Ալենի մասին «168 ժամի» հրապարակումից հետո Ֆեյսբուք սոցիալական ցանցում բազմաթիվ երիտասարդների կողմից «Փրկենք Ալենին» խումբ էր բացվել, որի անդամներն օրեր շարունակ զբաղվում են Ալենի և նրա մայրիկի փրկությամբ: Ընտանիքը սոսկալի ծանր պայմաններում է ապրում: Թերթի լրագրողի այցելության պահին երեխան ցրտի ու սարսափելի ծանր պայմաններում սովի էր մատնված: Մայրը, անկարողությունից և կենսական ծանր պայմաններից դրդված տրվել էր հարբեցողության:
Այս օրերին Նարինեի կյանքը փոխվել է, նա շրջապատված է հոգատար մարդկանցով: Արդեն երկու օր է նա իր կամքով գնում է բուժհաստատություն ստուգումների, հետագայում՝ նաև բուժվելու պատրաստակամությամբ: Փոքրիկ Ալենն արդեն հաճախում է ՀՕՖ-ի երեխաների պաշտպանության կենտրոն, որտեղ մասնագետները նրա հետ մեծ աշխատանք են տանում: Այս ընտանիքի կողքին են հազարավոր մարդիկ, կազմակերպություններ, ովքեր ձեռք են մեկնում թե՛ ֆինանսապես, թե՛ հոգեպես Նարինեին աջակցելու պատրաստակամությամբ: Այն, որ այս 3 օրերի ընթացքում մենք զգալի հաջողություններ ենք արձանագրում պարտական ենք ոչ թե քաղաքապետարանի և թաղապետարանի ներկայացուցիչներին, այլ «Փրկենք Ալենին» խմբի նվիրյալ երիտասարդներին:
