Եմենի հոգևոր և ցեղային առաջնորդները այսօր հայտարարել են, որ պաշտպանում են Եմենի «երիտասարդական հեղափոխությունը»: Այս մասին հաղորդում է Reuters գործակալությունը:
Նրանք նաև պահանջել են երկրի նախագահ Ալի Աբդալլահ Սալեհի անհապաղ հրաժարականը:
Հայտարարության մեջ, որը ստորագրվել է հինգշաբթի օրը Եմենի մայրաքաղաք Սանա’այում, ասվում է, որ ցուցարարների խաղաղ պահանջները պետք է բավարարվեն: Անհրաժեշտ է «երկրի նախագահի անհապաղ հրաժարականը և նրա բոլոր բարեկամների հեռացումը զինվորարական պաշտոններից»:
Մենք տեղեկացրել էինք, որ նախօրեին Եմենի ընդդիմությունը վերջնագիր է ներկայացրել գործող իշխանությանը:
Ընդդիմությունը պահանջել է երկրի նախագահ Ալի Աբդալլահ Սալեհից երկու շաբաթվա ընթացքում հրաժարական տալ և հրաժարվել է բանակցություններ վարել իշխանությունների հետ:
Երկուշաբթի օրը երկրի նախագահը անսպասելիորեն հայտարարել է, որ պատրաստ է հրաժարական տալ: Դրանից անմիջապես հետո ընդդիմությունը մերժել է Պարսից ծոցի արաբական երկրների համագործակցության խորհրդի այն առաջարկը, ըստ որի՝ Սալեհին և նրա ընտանիքին անվտագության և դատական հետապնդումից խուսափելու երաշխիքներ են տրվում:
Եմենի ընդդիմությունը վերջնագիր է ներկայացրել իշխանությունների այն բանից հետո, երբ նոր բախումների հետևանքով չորեքշաբթի օրը զոհվել էր 7 մարդ: Այսօր ամբողջ երկրով մեկ նախատեսված է «միլիոնի» հերթական երթ իրականացնել:
