ՀՀ էկոնոմիկայի նախարարության զբոսաշրջության և տարածքային տնտեսական զարգացման վարչության պետ Մեխակ Ապրեսյանը այսօր լրագրողներիններկայացրեց 2011թ. առաջին եռամսյակի ընթացքում Իրանից Հայաստան եկած զբոսաշրջիկների քանակն ու առկա խնդիրները: Նա տեղեկացրեց, որ առաջին երեք ամիսների ընթացքում Հայաստան այցելել են Իրանի ավելի քան 31,700 քաղաքացի,և միայն մարտ ամսվա ընթացքում այդ այցելությունների թիվը հասել է ավելի քան 25 հազարի: Իսկ միայն մարտի 20-30-ը ընկած ժամանակահատվածում Հայաստան է այցելել Իրանի ավելի քան 18 հազար քաղաքացի:
Վարչության պետը հիշեցրեց, որ 2010թ. առաջին եռամսյակին Իրանից Հայաստան են ժամանել շուրջ 28 հազար զբոսաշրջիկ, որից միայն մարտին` 21 հազար:
Ապրեսյանը նշեց, որ մարտի 20-31-ը ընկած ժամանակահատվածում իրենք իրանցի զբոսաշրջիկների շրջանում հետազոտություն են անցկացրել, պարզելու համար նրանց գնահատականը Հայաստանում զբոսաշրջության մակարդակի վերաբերյալ: «Հարցմանը մասնակցել է 101 իրանցի զբոսաշրջիկ։Պարզվել է, որ այցելուների միջին տարիքը 30-40 է, իսկ հարցին, թե արդյոք կրկին կայցելե՞ն Հայաստան կամ խորհուրդ կտան իրենց ծանոթներին, հարցվողներից 72-ը պատասխանել է՝ այո»:
Հարցաթերթիկում առկա մի շարք կետեր գնահատվել են 10 բալանոց համակարգով: Իրանցի զբոսաշրջիկները Հայաստանի գրավչությունը գնահատել են 6, փողոցների մաքրությունը` 7, ծառայությունների հասանելիությունը` 6, տրասպորտը` 7, ժամանցի բազմազանությունը` 6, հյուրանոցային ծառայությունները` 6, գների արդարացվածությունը` 6, սնունդը` 7, տեղացիների վերաբերմունքը` 7, կեցությունը` 6 և այլն:
Ապրեսյանի խոսքերով, այս ցուցանիշները միջինից բարձր են, սակայն դա դեռ չի նշանակում, որ խնդիրներ չկան. «Տասը բալին հասնելու համար բավական անելիքներ ունենք,և պետք է ձգտենք, որ և՛ Իրանից, և՛ այլ երկրներից այցելող զբոսաշրջիկները ոչ միայն բավարարված, այլ նաև իրենց ակնկալիքները գերազանցած հեռանան Հայաստանից»:
