Վերջերս նախագահ Սերժ Սարգսյանը արտոնյալ պայմաններ էր խոստացել այն ընկերություններին, որոնք կստեղծեն նոր մրցունակ ապրանքներ ու ծառայություններ: «Պատրաստ ենք 3-4 տարով ազատել շահութահարկից, հետաձգել ավելացված արժեքի հարկի վճարումը, պատրաստ ենք այլ օժանդակությունների»,- ասել էր Սերժ Սարգսյանը:
Այսօր լրագրողների հետ հանդիպման ժամանակ պատասխանելով այն հարցին, թե ինչպես է Արժույթի միջազգային հիմնադրամը վերաբերվում հարկային արձակուրդների վերաբերյալ ՀՀ նախագահ Սերժ Սարգսյանի այդ հայտարարությանը, ՀՀ-ում ԱՄՀ մշտական ներկայացուցիչ Գիերմո Տոլոսան նշեց, թե իրենք չեն սիրում հարկային արձակուրդներ:
«ԱՄՀ-ն չի սիրում շահութահարկի արձակուրդներ, ընդհանրապես չի սիրում»,- ասաց Գ. Տոլոսան` հավելելով, որ հարկային արտոնությունները առնվազն չեն լուծի հարկեր/ՀՆԱ հարաբերակցության բարձրացման խնդիրը ՀՀ-ում, որն ըստ Տոլոսայի բավականին լուրջ խնդիր է:
Անդրադառնալով կառավարության այն որոշմանը, ըստ որի` 30 օրվա ընթացքում 30 և ավելի տոկոսով որևէ ապրանքի թանկացման դեպքում կառավարությունն է սահմանում գները, նշեց, որ այս որոշումը ևս իրենք բացասաբար են գնահատում:
«ԱՄՀ-ն որպես կանոն կարծում է, որ գները վերահսկելու նմանատիպ վարչական մոտեցումներն ու միջոցառումները արդյունավետ չեն, ուստի մենք դրանք չենք սատարում: Դրանք հաճախ հանգեցնում են ապրանքների պակասուրդի, մաքսանենգ ներկրման, լրացուցիչ ծախսեր և բեռ են առաջացնում բյուջեի համար և աղճատում շուկան: Նման վարչական միջոցառումները պետք է արագ փոխարինվեն սոցիալական ապահովության հասցեական միջոցառումներով, որն էլ կբացառի նման աղճատումները»,- ասաց ԱՄՀ ներկայացուցիչը:
