Երեկ կայացան Եվրոպայի լիգայի քառորդ եզրափակիչ պատասխան հանդիպումները: Ինչպես Չեմպիոնների լիգայի քառորդ եզրափակիչում, այստեղ նույնպես առաջին հանդիպումներից հետո ընդամենը մեկ դիմակայության արդյունքն էր մնում պարզել. Առաջին խաղերում «Պորտու»-ն, «Բենֆիկա»-ն և «Վիլյառեալ»-ը խոշոր հաշվով հաղթանակներ էին տոնել, իսկ «Դինամո Կիև»-«Բրագա» խաղն ավարտվել էր 1:1 հաշվով:
«Պորտու»-ն, որ սեփական հարկի տակ 5:1 հաշվով ջախջախել էր «Սպարտակ»-ին, հյուրընկալվելիս նույնպես կարողացավ 5 գնդակ ուղարկել մոսկվացիների դարպասը` սեփականն ընդունելով միայն 2-ը և հաղթեց ընդհանուր 10:3 հաշվով:
«Բենֆիկա»-ն առաջին խաղում 4:1 հաշվով էր հաղթել հոլանդական «Էյնդհովեն»-ին և պատասխան խաղի 25-րդ րոպեից զիջում էր 2:0 հաշվով` կասկածի տակ դնելով կիսաեզրափակիչի ուղեգրի հարցը, սակայն պորտուգալացիները կարողացան 2 գնդակ ուղարկել տանտերերի դարպասն ու երկու խաղերի արդյունքում հաղթանակ տարան 6:3 հաշվով:
«Վիլյառեալ»-ը հոլանդական «Տվենտե»-ի հետ խաղում առնձնակի խնդիրներ չունեցավ: Իսպանացիները նախորդ հանդիպման համեմատ երկու գնդակ պակաս խփեցին և հաղթեցին 1:3 հաշվով: Երկու խաղերի արդյունքը` 8:2:
«Բրագա»-«Դինամո Կիև» խաղում տանտերերին հարկավոր էր ընդամենը գնդակ բաց չթողնել. 0:0 հաշիվը նրանց դուրս էր բերում կիսաեզրափակիչ: Պորտուգալացիների գործը դժվարացավ, երբ հանդիպման 30-րդ րոպեին խաղադաշտից հեռացվեց Պաուլու Սեզարը: Այդուհանդերձ, 10 հոգով խաղացող «Բրագա»-ի գրոհներն ավելի վտանգավոր էին, քան ուկրաինացիները: «Բրագա»-«Դինամո Կիև»` 0:0:
Այսպիսով, Եվրոպայի գավաթի կիսաեզրափակիչի 4 թիմերից երեքը պորտուգալական են: Կիսաեզրափակիչի զույգերը կազմում են` «Բրագա»-«Բենֆիկա», «Վիլյառեալ»-«Պորտու»:
