Կանադայի Սենատի աուդիտորական ստուգումը ցույց է տվել, որ երկրի խորհրդարանի վերին պալատի 21 անդամներ կատարել են ֆինանսական չարաշահումներ. այդ ֆինանսները հատկացվում են նրանց գործունեության համար: Այս մասին հայտնում է СTV հեռուստաալիքը:
Հաղորդվում է, որ կասկածյալների թվում են միանգամից 3 բարձրաստիճան սենատորներ: «Նրանք են՝ Սենատի խոսնակ Լեո Գուսակոսը, կառավարության ներկայացուցիչների ղեկավար, իշխող Պահպանողական կուսակցության անդամ Կլոդ Կարինյանը և ընդդիմության ներկայացուցիչների առաջնորդ, Լիբերալ կուսակցության անդամ Ջեյմս Քոուենը»,- նշել է հեռուստաալիքը:
Մասնավորապես, Գուսակոսի «կասկածելի» ծախսերի շարքին աուդիտորները դասել են «բարեգործական միջոցառման նպատակով» նրա օգնականներից մեկի գործուղման 1.200 դոլարի ծախսը: Եվս 4.800 դոլար խոսնակը ծախսել է «աշխատակցի պայմանագրի» վրա՝ նշում է СTV-ն: Գուսակոսն արդեն գանձարան է վերադարձրել 1.200 դոլարը, սակայն մյուս գումարի հարցով մտադիր է դիմել միջնորդ դատարան:
Քոուենին վերագրվում է 8.200 դոլարի չարաշահում, նա ևս մտադիր է միջնորդ դատարան դիմել: Կարինյանի չարաշահումների մեջ նշվում է 2.400 դոլար՝ իր օգնականներից մեկի գործուղման համար, սակայն արդեն վերադարձրել է նշված գումարը:
Աուդիտորական ստուգման մանրամասները կհրապարակվեն հաջորդ շաբաթ:
