«Յոթի գործով» մեղադրվող, նախկին քաղբանտարկյալ Մյասնիկ Մալխասյանի գործով Եվրադատարանը սկսել է ՀՀ կառավարության հետ հարց ու պատասխանը:
Հիշեցնենք, որ Մյասնիկ Մալխասյանը, Սասուն Միքայելյանը, Ալեքսանդր Արզումանյանը, Գրիգոր Ոսկերչյանը, Շանթ Հարությունյանը, Սուրեն Սիրունյանը, Հակոբ Հակոբյանը մեղադրվում էին 2008 թ. ՀՀ նախագահի ընտրություններից հետո սպանություններով զուգորդված զանգվածային անկարգություններ կազմակերպելու և պետական իշխանությունը բռնությամբ զավթելու համար:
Մյասնիկ Մալխասյանի փաստաբան Մելանյա Առուստամյանը «Առաջին լրատվականին» տեղեկացրեց, որ Եվրադատարանը հարցեր է ուղղել ՀՀ կառավարությանը և տվել տասնվեցշաբաթյա ժամկետ, որը լրանում է հունիսին: ՀՀ կառավարությանն ուղղած հարցերում Եվրադատարանը նշել է, թե ինչո՞ւ չի կիրառվել գրավը որպես այլընտրանքային խափանման միջոց, ինչո՞ւ է պետությունը կիրառել տրաֆարետային որոշումներ և ի՞նչ հիմնավորումներ է ունեցել: Հարցերից մեկն էլ վերաբերում է մինչև ձերբակալությունը Մյասնիկ Մալխասյանի նկատմամբ ապօրինի ազատազրկմանը:
Մելանյա Առուստամյանը մեր զրույցի ժամանակ նշեց, որ Եվրադատարանի հարցերը բխում են Մարդու իրավունքների եվրոպական կոնվենցիայի 5-րդ հոդվածից («Ազատության և անձնական անձեռնմխելիության իրավունք»): Փաստաբանի հավաստմամբ, Եվրադատարան ուղարկված գանգատում ներկայացվել են փաստեր, համաձայն որոնց` Մյասնիկ Մալխասյանի գործով խախտվել են նաև Մարդու իրավունքների եվրոպական կոնվենցիայի 6-րդ («Արդար դատաքննության իրավունք»), 10-րդ («Արտահայտվելու ազատություն»), 11-րդ («Հավաքների և միավորման ազատություն») հոդվածները, նաև 3-րդ հոդվածը, որը վերաբերում է խոշտանգումների արգելմանը:
Թեև Մյասնիկ Մալխասյանի գործը ներկայացվել է փուլերով, սակայն Եվրադատարանը դրանք միավորել է մեկ գործի մեջ: Մելանյա Առուստամյանը սպասում է կառավարության պատասխանին, որպեսզի ինքն էլ ներկայացնի իր առարկությունները: