«Օրինաց երկիրը» կիրակի օրը կուսակցության ընդլայնված նիստ է անցկացրել, որտեղ կարևորել է Հայաստանում «միասնական հասարակական-քաղաքական պլատֆորմի և օրակարգի ստեղծումը»: «Հաշվի առնելով երկրում առկա սոցիալ-տնտեսական ծանր իրավիճակը և նպատակ հետապնդելով վճռական քայլեր ձեռնարկել Հայաստանի անվտանգության ապահովման, պետական և հանրային կյանքի բոլոր բնագավառներում համարձակ ու ժողովրդանպաստ բարեփոխումների խորացման, պետության տնտեսական առաջընթաց զարգացման և ժողովրդավարության խորացման համար, կարևորում է Հայաստանում միասնական հասարակական-քաղաքական պլատֆորմի և օրակարգի ստեղծումը»,- նշված է այդ կուսակցության հրապարակած հաղորդագրության մեջ:
Այդ կուսակցությունը որոշել է նախաձեռնել լայն կոնսոլիդացիա՝ երկրի խնդիրներով մտահոգ առավել շատ քաղաքական ուժերի և հասարակական ակտիվ շրջանակների ներկայացուցիչների, հասարակական կազմակերպությունների և քաղաքացիական հասարակության շահագրգիռ մասնակցությամբ: Կուսակցության նախագահ Արթուր Բաղդասարյանն էլ այդ նիստի ժամանակ հայտարարել է, թե մինչ այդ քաղաքական կոնսուլտացիաներ են տեղի ունեցել 50-ից ավելի հասարակական և քաղաքական կազմակերպությունների հետ, որոնք պատրաստակամություն են հայտնել միանալու նախաձեռնությանը, իսկ գործընթացը կրում է շարունակական բնույթ:
«Առաջին լրատվական»-ը այսօր փորձեց խորհրդարանական ուժերից տեղեկանալ, թե Ա. Բաղդասարյանն արդյոք իրենց հետ քննարկե՞լ է այդ հարցը, կամ իրենք համաձա՞յն են այդ կոնսոլիդացիային: ՀԱԿ խմբակցության քարտուղար Արամ Մանուկյանն անգամ տեղյակ չէր, որ ՕԵԿ-ը նման հայտարարություն է հրապարակել: «Մենք կքննարկենք, տեսնենք, թե ինչ առաջարկ է, արձագանք կլինի: Ես չգիտեմ, թե բովանդակությունն ինչ է, և չեղած բովանդակության մասին չեմ կարող եզրակացություն անել»,- մեզ հետ զրույցում ասաց նա: Իսկ ընդհանրապես ՀԱԿ-ը կարո՞ղ է ՕԵԿ-ի հետ համագործակցել որևէ հարցի շուրջ: «Մենք խորհրդարանում ունենք համատեղ ստորագրություններ հավաքելու հաջողված փորձ և այլ ձևեր դեռևս չենք քննարկել»,- պատասխանեց Ա. Մանուկյանը:
Վերջինս նաև ավելացրեց, թե իրենք ունեն ծրագրեր ու մոտեցումներ, իրենց համախոհները: Եվ որ իրենց մոտեցումները շատ հստակ են ու ընդգծված: Ոչ մի անուրվագիծ բաներ չունենք: Որևէ մեկը չի կարող մեզ փափկամորթ, ոչ ճշգրիտ քայլերի մեջ մեղադրել: Մենք հայտարարել ենք, որ կոնսոլիդացիան մեզ ձեռնտու է, և որքան շատ, այնքան շուտ: Եվ այս պահին ամենևին շտապելու կարիք չկա: Ես գնում եմ իմ ծրագրով, թե որքան կոնսոլիդացիա կլինի, կտեսնենք»,- ավելացրեց պատգամավորը:
«Ժառանգություն» խմբակցության ղեկավար Ռուբիկ Հակոբյանն էլ մեզ հետ զրույցում ասաց, թե եթե ՕԵԿ-ն իրենց հետ նման թեմայով քննարկում արած լիներ, ինքն այդ մասին տեղյակ կլիներ: Բայց տեղյակ չէ: Ռ. Հակոբյանը նաև ավելացրեց, թե ինքը լայն ֆորմատով համագործակցությունների կողմնակից է, բայց ՕԵԿ-ին կոչ է անում ճշտել իր առաջարկի սկզբունքները: Բայց չէ՞ որ այդ կուսակցությունը պետական և հանրային կյանքի բոլոր բնագավառներում համարձակ ու ժողովրդանպաստ բարեփոխումներ է առաջարկում: «Բարեփոխում, իշխանափոխություն՝ դրանք թափառող ձևակերպումներ են: Պետք է հստակ ասել, թե ինչի մասին է խոսքը»,- ասաց Ռ. Հակոբյանը:
Արդյո՞ք ՕԵԿ-ի այդ նախաձեռնությունը չի նշանակում, որ 2017թ. խորհրդարանական ընտրություններին ընդառաջ այդ կուսակցությունը ցանկանում է համախմբել ոչ իշխանական դաշտի ուժերին և առանցքում ինքը լինել: «Ես չգիտեմ, թե ՕԵԿ-ն ինչ խնդիր է դրել, ես պարզապես կասեմ, որ ինքս կողմ եմ համախմբմանը: Գտնում եմ, որ ճիշտ քաղաքական զարգացումներ ապահովելու համար պետք է լայն ձևաչափով համախմբում լինի: Ես տեսնում եմ, որ դրա հիմքում պետք է լինեն առողջ, թափանցիկ, ժողովրդի համար համոզիչ շեշտադրումներ»,- ասաց Ռ. Հակոբյանը:
Վերջինս, սակայն, կարծում է, որ քաղաքական դաշտում ով ինչ խնդիր էլ դնի իր առաջ կամ մյուսներին առաջարկի, չպետք է իր շուրջը համախմբելու հավակնություններ ունենա: «Որովհետև դա արդեն որոշակի բարդույթավորում է դաշտը: Պետք է նստեն միասնական օրակարգ քննարկեն, և ոչ թե մեկի նախաձեռնությունը լինի կամ մեկի շուրջը ձևավորվի: Այդ միասնական օրակարգի հիմնական խնդիրը պետք է լինի լուրջ ձևաչափով համագործակցության դաշտ ձևավորելը»,- եզրափակեց Ռ. Հակոբյանը:
