Ինչպես տեղեկացրել էինք, Գորիսի քաղաքապետի ընտրություններում առաջադրված նախկին թեկնածու, Գորիսի «ԳԱՄՄԱ» ընկերության տնօրեն, գործարար Տիգրան Կարապետյանին կանչել էին ոստիկանության Գորիսի բաժին՝ Սյունիքի մարզպետ Սուրիկ Խաչատրյանի մեքենայի ուղղությամբ հնչած կրակոցների հետ կապված։
«Առաջին լրատվական»-ի հետ զրույցում Տիգրան Կարապետյանը նշեց, որ ոստիկանություն կանչելուց անմիջապես հետո եկել են իրենց տուն՝ խուզարկության: «Անօրինական ոչ մի բան չի հայտնաբերվել։ Այս պահի դրությամբ դեռ որ չեն կանչել ոստիկանություն»,- ասաց նա։
Տիգրան Կարապետյանը նշեց, որ մի շարք մարդկանց տներում եղել են խուզարկություններ, այդ թվում՝ Բուդաղյանների տանը։
«Կան որոշ մարդիկ, ովքեր շահագրգռված են անընդհատ ուղղությունը մեր ուղղությամբ տեղափոխելու համար։ Կարծում եմ՝ եթե իսկապես շահագրգռված են բացահայտմամբ, ապա պետք է չխանգարեն իրավապահներին, նրանք կհայտնաբերեն»,- ասաց նա։
Հարցին՝ կարծում եք՝ մայիսի 2-ին տեղի ունեցածը կբացահայտե՞ն իրավապահները, Տիգրան Կարապետյանը պատասխանեց. «Մեր բոլորի պահանջը դա է։ Եվ քանի որ փորձում են մեզ հետ կապել վերջին իրադարձությունը, բոլորս շահագրգռված ենք, որպեսզի կատարվի ճիշտ քննություն, և թե՛ մայիսի 2-ի, թե մայիսի 20-ի բոլոր մեղավորները բացահայտվեն ու պատժվեն»։
Սուրեն Խաչատրյանի ընտանիքին արդյոք մեկ անգամ պատասխանատվության կենթարկե՞ն: Տիգրան Կարապետյանը վստահ նշեց, որ այս անգամ, անկախ անունից, պաշտոնից, փողի չափից, բոլոր մեղավորները պատժվելու են: «Այս անգամ ես վստահ եմ և ներքին համոզմունք ունեմ»,- հավելեց նա։
Իր մոտ ընկեր Հարություն Զաքարյանը, ում աչքը օրերս վիրահատեցին ՌԴ-ում, պատրաստվում է երկրորդ վիրահատությանը: «Չենք ուզում շտապել, բայց այն վտանգը, որ հնարավոր է՝ աչքը հեռացնեն, այլևս չկա: Հիմա սպասվում է երկրորդ վիրահատությունը, իսկ երկրորդը կախված է դինամիկայից. հիմա հետվիրահատական բուժման պրոցեսն է»,- ասաց նա։
