Հայաստանի հանրապետական կուսակցության Գործադիր մարմնի հերթական նիստի ավարտից հետո լրագրողները ՀՀԿ անդամ, ԱԺ փոխնախագահ Հերմինե Նաղդալյանից հետաքրքվել են, թե քննարկվե՞լ է այսօր Գորիսում Սյունիքի մարզպետ Սուրիկ Խաչատրյանի մեքենայի ուղղությամբ կրակելու հարցը, վերջինս պատասխանեց, որ հարցը նախ՝ մասնագետների վերլուծության և մասնագիտական գնահատականի կարիք ունի, և միաժամանակ հավելեց, որ հարցը, բնականաբար, կուսակցության ներսում մտահոգություն է առաջացրել։
Դիտարկմանը, թե անպատժելիության մթնոլորտի հետևանք է տեղի ունեցածը, և փաստորեն ժողովուրդն ինքն է պատժում Սուրիկ Խաչատրյանին, Հերմինե Նաղդալյանը պատասխանեց. «Նման հարցերի վերաբերյալ ճիշտ չի լինի, որ մենք նախապես ենթադրություններ անենք՝ առանց իրական իրավիճակը իմանալու։ Ես կարծում եմ, որ մենք պետք է չշտապենք և թույլ տանք, որ մասնագետները՝ քրեագետներն ու իրավաբանները պատասխան տան»։
Լրագրողները նաև հարցեր ուղղեցին վաղը Ռիգայում մեկնարկելիք ԵՄ արևելյան գործընկերության գագաթաժողովից, Հայաստանի սպասելիքներից, Ռիգա մեկնող պատվիրակության կազմից: «Վաղը-մյուս օրը կտեսնենք, թե ի՞նչ տեսք կունենանա փաստաթուղթը»,- ասաց Նաղդալյանը`հավելելով, որ այժմ աշխատանքային գործընթաց է, մանրամասներ դեռ հնարավոր չէ հրապարակել և որ նիստի ժամանակ նախագահ Սերժ Սարգսյանը չի խոսել գագաթաժողովից սպասելիքների մասին: