Երուսաղեմի Տաճարի Ինքնիշխան ռազմական միաբանության ասպետները աշխարհի տարբեր երկրներից ժամանել են Երևան: Նրանք Ծիծեռնակաբերդի հուշահամալիրում իրենց հարգանքի տուրքը մատուցեցին Եղեռնի զոհերի հիշատակին, նաև ստորագրեցին Հայոց ցեղասպանությունը ճանաչող և դատապարտող հուշագիր:
Երուսաղեմի Տաճարի Ինքնիշխան ռազմական միաբանության Հայաստանի ներկայացուցիչ՝ ասպետ, գերագույն հրամանատար Բագրատ Լալայանը լրատվամիջոցների հետ զրույցում նշեց, որ հուշագրի ստորագրումից հետո առավել մեծ թափով կկարողանան աջակցել աշխարհում Հայոց ցեղասպանության ճանաչման գործին: Ըստ նրա՝ աշխարհում 20 հազարից ավելի խաչակիր ասպետ կա, որոնք պաշտպանում են քրիստոնյաների շահերը, ուստի նրանք իրենց երկրներում կդառնան Ցեղասպանության ճանաչման կոչերով հանդես եկողներ:
Ֆիլադելֆիայից ժամանած ասպետ Ջոզեֆ Փոսենսկին շեշտեց, որ Երևանում է 100 տարի առաջ սպանված հայ ասպետ եղբայրներին և հայ ժողովրդին ոգեկոչելու համար. «Հիշելու և պահանջելու, որ այն ինչ տեղի է ունեցել՝ նորից չի կրկնվի որևէ պատճառով: Պետք է դաս քաղել անցյալի սխալներից: Ամենամեծ խնդիրն այսօր հավատքի ժողովուրդների միասին լինելու կարողության մեջ է»:
Տեխասի ներկայացուցիչ Նելու Փրոդանը նկատեց, որ երբ Ցեղասպանությունը տեղի ունեցավ, Ամերիկան առաջինը ձեռք մեկնեց ցեղասպանությունից մազապուրծ եղած հայերին: «Ամերիկայում Հայոց ցեղասպանության մասին բոլորը գիտեն, մեզ մնում է այս պահին մտովի հիշել, թե ինչ է արել 100 տարի առաջ Ամերիկան օգնելու կարիքավոր հայերին և պահանջելու, որ մեր երկիրը պաշտոնապես ճանաչի հարյուրամյա վաղեմության իրադարձությունները»,- նշեց նա:
Մանրամասները՝ տեսանյութում: