«Տարբեր ֆորմատներով նաիրիտցիների հետ հանդիպել եմ ոչ հրապարակային, միշտ էլ կապի մեջ ենք եղել»,-ասաց նստացույց անող նաիրիտցիներին այցելած Նիկոլ Փաշինյանը՝ անդրադառանալով «Առաջին լրատվական»-ի այն հարցին, թե նաիրիտցիները պիտի նստացույց անեի՞ն, որ նա մոտենար և հետաքրքրվեր նրանց հուզող խնդիրներով, չէ՞ որ արդեն շուրջ 6 ամիս է` նաիրիտցիները փողոցում պայքարում են տարբեր ակցիաների միջոցով:
Հարցին, թե Երվանդ Զախարյանի խոստումներին, որոնք փոխանցեց նաիրտցիներին, հավատու՞մ է , Փաշինյանը պատասխանեց, որ հավատալ-չհավատալու հարց չկա. «Ես կոնկրետ խոստում ստացա, լսեցի, կա կոնկրետ խոստում, մենք հիմա պայմանավորվում ենք այդ հարցով, կզբաղվենք, կապրենք` կտեսնենք»:
«Առաջին լրատվական»-ը Նիկոլ Փաշինյանից հետաքրքրվեց, թե կոնկրետ ի՞նչ քայլեր է ձեռնարկելու այսօր հասարակությանը հուզող մեկ այլ հարցի` էլէկտրաէներգիայի թանկացման մասով, վերջինս ասաց. «Նախաձեռնություններ կան ԱԺ-ում, բայց ես ձեզ կոչ եմ անում, մեզ ուղղել այնպիսի հարցեր, որ մեզ են ուղղված, մենք կարող ենք հարցերը բարձրացնել, առաջիկայում կլինեն նախաձեռնություններ, ըստ այդմ՝ հարցերը կբարձրացվեն, բայց լուծումները պետք է պահանջենք, այս շենքից»,-ասաց նա:
Ն. Փաշինյանից հետաքրքրվեցին, այսքան ժամանակ խորհրդարանական ամբիոնից խնդիրներ է բարձրացրել, դրանք հանգե՞լ են լուծումների, այսինքն՝ կա՞ հարց, որ ինքը բարձրացրել և լուծում է ստացել. «Այսօր Հայաստանում բազմաթիվ չլուծված հարցեր կան և դրա համար էլ այսօր Հայաստանում, մեր քաղաքական գործունեությունը փորձում ենք կառուցել էնպես, որ հարցերը ոչ միայն բարձրացվեն, այլև լուծվեն, եթե չեն լուծվում` դա ուրեմն հրավեր է Հայաստանի քաղաքացիներին, որ պետք է այդ հարցերի լուծման ուրիշ մեխանիզմներ գտնել»,-պատասխանեց ԱԺ պատգամավորը: Ըստ նրա` նոր մեխանիզմ գտնելու պարագայում հնարավոր կլինի հարցերը ոչ միայն բարձրացնել, այլև լուծել. «Հայաստանի ընդդիմությունը 25 տարի իշխանափոխության հարց է բարձրացնում. Լուծել ա՞ էտ հարցը, թե չի լուծել … չի լուծել, Սերժ Սարգսյանը 2008 թ-ին ասում էր՝ Հայաստանը առաջիկա ամիսներին նոր ատոմակայանի շինարարությունը կսկսի, լուծել ե՞ն, չեն լուծել , ասում էին Իրան-Հայաստան եկաթուղի կկառուցվի` չի լուծվել , այսինքն` Հայաստանում ոչ միայն իմ բարձրացրած հարցերը չեն լուծվում, Սերժ Սարգսյանի բարձրացրած հարցերը չեն լուծվում, դուք ինձ ի՞նչ եք էդ հարցը տալիս, առաջինը Սերժ Սարգսյանին տվեք, դրա համար Հայաստանում պետք է ձևավորել այնպիսի ուժ, որը ոչ միայն հարցեր առաջացնի, այլ կարողանա մարդկանց ամենօրյա, ռազմավարական, մարտավարական հարցեր լուծի»,-ասաց ընդդիմադիր պատգամավորը:
Նիկոլ Փաշինյանը չպատասխանեց մեր այն հարցին թե արդյո՞ք «Քաղաքացիական պայմանագրով» գնում է դեպի ընտրություններ:
Մանրամասները՝ տեսանյութում
