Կենտրոն և Նորք-Մարաշ վարչական շրջանների ընդհանուր իրավասության դատարանում Արշակ Վարդանյանի նախագահությամբ շարունակվեց Հերիքնազ Խաչատրյանի գործի դատական քննությունը:
2014 թվականի գարնան վերջին նույն դատարանում ավարտվել է Հերիքնազ Խաչատրյանի քրոջ՝ Բավական Խաչատրյանի գործի դատական քննությունը:
Կազմակերպված խմբի կազմում թրաֆիքինգի՝ սեռական շահագործման նպատակով Դուբայ ուղարկելու համար հայ կանանց հավաքագրելու մեղադրանքով Բավականը մեղավոր է ճանաչվել ու դատապարտվել 11 տարի 6 ամիս ազատազրկման:
Հիմա թրաֆիքինգի մեղադրանքով դատվում է Բավականի 25-ամյա քույր Հերիքնազը:
Ըստ մեղադրանքի՝ Հերիքնազ Խաչատրյանը, բնակվելով Արաբական Միացյալ Էմիրությունների Դուբայ քաղաքում, Նելլի Ներսիսյանի ղեկավարությամբ զբաղվելով մարմնավաճառությամբ, ներգրավվել է Նելլի Ներսիսյանի ղեկավարած կազմակերպված խմբի մեջ ու, խմբում կատարված դերաբաշխման համաձայն՝ քրոջ՝ Բավականի հետ կատարել է հայ կանանց հավաքագրելուն, Դուբայ տեղափոխելուն, թաքցնելուն ուղղված գործողություններ:
Հերիքնազ Խաչատրյանին մեղադրանք է առաջադրված ինչպես թրաֆիքինգով զբաղվող կազմակերպված խմբի կազմում կանանց հավաքագրելու, Դուբայ ուղարկելու, այնպես էլ հավաքագրելու փորձ անելու համար՝ ՀՀ քրեական օրենսգրքի 132 հոդվածի 3 -րդ մասի 1-ին և 34-132 հոդվածի 3-րդ մասի 1-ին կետերով:
Համաձայն առաջադրված մեղադրանքի՝ 2008 թվականից Հերիքնազ Խաչատրյանը թրաֆիքինգով զբաղվող կազմակերպված խմբի կազմում, իր քրոջ հետ միասին հայ կանանց հավաքագրել ու Դուբայ է տեղափոխել՝ այնտեղ սեռական շահագործման ենթարկելու նպատակով:
Հերիքնազին մի քանի հանցադրվագ է մեղսագրված: Ամբաստանյալ Հերիքնազը հայտարարել է, թե իրեն առաջադրված մեղադրանքները սուտ կեղծիքներ են, նա իրեն մեղավոր չի ճանաչում:
Հերիքնազը քրոջից ավելի բուռն է արձագանքում դատական նիստի ժամանակ հնչող ցուցմունքներին, ինչի համար նախագահողը նրան մի քանի անգամ նկատողություն է արել, իսկ նախորդ նիստի ավարտին, երբ դռնփակ պայմաններում հարցաքննվում էր տուժող Ելենան, ամբաստանյալ Հերիքնազի նկատմամբ դատական սանկցիա է կիրառվել, ամբաստանյալը 2 ժամով հեռացվել է դատարանի դահլիճից: Այս նիստը ևս անցկացվեց ամբաստանյալ Հերիքնազ Խաչատրյանի բացակայությամբ, սանկցիայի երկու ժամը դեռ չէր լրացել…
Դռնփակ-դռնբաց նիստի սկզբում ամբաստանյալի շահերի պաշտպանները հայտարարեցին, թե «հետ են վերցնում» նախագահող դատավորի նկատմամբ նախորդ նիստի ավարտին հայտնած ինքնաբացարկի միջնորդությունը:
Սակայն նոր միջնորդություն արեցին, որ դատավորը մեղադրողին վերադարձնի մեղադրական եզրակացությունը, որպեսզի մեղադրողը խմբագրի այն, Հերիքնազին առաջադրված մեղադրանքի ծավալից ևս հանի Անահիտ Բ.-ին հավաքագրելու վերաբերյալ դրվագը, ինչպես որ այն հանել էր Բավական Խաչատրյանի մեղադրանքի ծավալից:
Ըստ պաշտպան Հ. Գևորգյանի՝ եթե մեղադրանքի կողմը երկու քույրերին որպես նույն կազմակերպված խմբի անդամների է դատում, ապա Բավականի մեղադրանքից հանված դրվագը պետք է հանվի նաև Հերիքնազի մեղադրանքից, կամ Բավականին նորից այդ դրվագով մեղադրանք պիտի առաջադրեն, բերեն, նորից նստեցնեն ամբաստանյալի աթոռին ու դատեն…
Դատարանը մերժեց պաշտպանական կողմի միջնորդությունը՝ ակնհայտ անհիմն լինելու հիմքով: Նախագահողը նշեց, որ պաշտպանի նշած հիմքով մեղադրական եզրակացությունը մեղադրողին վերադարձնելու իրավասություն դատարանը չունի, մեղադրանքի ծավալը փոփոխելը, խստացնելը միայն մեղադրողի իրավասությունն է:
Շարունակվեց տուժող Ելենայի, ապա նրա մայրիկի դռնփակ հարցաքննությունը:
Երբ մեղադրողը միջնորդեց տուժող Ելենայի մայրիկի հարցաքննությունը ևս դռնփակ պայմաններում անցկացնելու վերաբերյալ, քանի որ կարող էին հնչել նրա դստեր անձնական կյանքին վերաբերող մանրամասներ, ամբաստանյալի շահերի պաշտպան Գևորգյանը պոռթկաց. «Մարմնավաճառների ամաչելը ո՞րն է: Բացեիբաց կանգնում են՝ չեն ամաչում, հիմա դատարանում ամաչո՞ւմ են… Ես առարկում եմ…»:
Դատարանը բավարարեց մեղադրողի միջնորդությունը, տուժողի մայրիկը ևս հարցաքննվեց դռնփակ պայմաններում:
Ըստ մեղադրանքի՝ Հերիքնազը հեռախոսազրույցի միջոցով, իսկ քույրը՝ Բավականը, անձնական հանդիպման ժամանակ համոզել են այս տուժողին, որ Դուբայում բարձր վարձատրվող աշխատանք կարող են առաջարկել:
Ելենան հավատացել է, մեկնել է Դուբայ, բայց այնտեղ ընդդիմացել է, քանի որ նրան առաջարկել են ավանդական հարաբերությունից բացի՝ «այլ բաներ էլ անել»: Ելենան պահանջել է իրեն հետ ուղարկել Հայաստան: Նրան հետ են ուղարկել: Սա 2008 թվականի ամռանն է եղել…
Հաջորդ նիստին դատարանը կհարցաքննի այն տուժողներին ու վկաներին, ովքեր կներկայանան դատարան: Նիստը ավարտվեց դռնբաց պայմաններում, հնարավոր է, որ այդպես էլ շարունակվի:
