Հետազոտությունը ցույց է տվել, որ եթե տղամարդը բուժել է հիվանդ լնդերը, նրա ինքնազգացողությունը պրոստատիտի դեպքում լավացել է, գրում է The Times of India-ն: Նվազել է նրա շագանակագեղձի բորբոքման մակարդակը:
Այս բացահայտումն արել է Նաբիլ Բիսսադան Քեյս Վեսթերն ռեզերվ համալսարանի ատամնաբուժական դպրոցից: Նրա խոսքով՝ լնդերի հիվանդությունները վնասում են ամբողջ օրգանիզմը՝ բորբոքում առաջացնելով մարմնի տարբեր մասերում: Նա հետազոտել է 21 տարեկան և ավելի բարձր տարիքի 27 տղամարդու: Նրանցից յուրաքանչյուրը շագանակագեղձի բիոպսիա է ունեցել և արյան անալիզ հանձնել:
27 տղամարդկանցից 21-ը բորբոքում չի ունեցել կամ աննշան է եղել: Բայց 15 մարդու դեպքում չարորակ գործընթացներ են հայտնաբերվել, երկուսի դեպքում՝ բորբոքում և չարորակ գործընթացներ: Բոլոր տղամարդկանց դեպքում արձանագրվել է լնդերի չափավոր կամ սուր հիվանդություն, նրանց համապատասխան բուժում է նշանակվել:
4-8 շաբաթ հետո առաջընթաց է գրանցվել. այդ ամբողջ ընթացքում տղամարդկանց շագանակագեղձի բորբոքմամբ բուժում չի արվել: Չնայած դրան՝ 21 տղամարդու դեպքում նվազել է պրոստատ-սպեցիֆիկ անտիգենի մակարդակը: Պարզվել է՝ բորբոքման ամենաբարձր մակարդակով տղամարդիկ են ամենից շատ շահել լնդերի բուժումից: 6 տղամարդ ոչ մի փոփոխություն չի ունեցել:
