Ֆրանսիայի նախագահ Ֆրանսուա Օլանդի նախկին կինը՝ Սեգոլեն Ռուայալը, կզբաղեցնի Ֆրանսիայի Պետական ներդրումային բանկի փոխնախագահի պաշտոնը: Այս մասին այսօր «Ֆրանս- էնտեր» ռադիոկայանի եթերում հայտնել է դեպոզիտային-խնայողական դրամարկղի գլխավոր տնօրեն Ժան Պիեռ Ժույյեն, որը նաև բանկի նախագահն է:
«Նա կդառնա բանկի փոխնախագահ: Ես նրա թեկնածությունը կներկայացնեմ վաղը՝ Դիժոնում կայանալիք տնօրենների խորհրդի առաջին նիստում: Հաշվի առնելով նրա հաղորդակցական ունակություննրը՝ նա կարող է կարևոր դեր խաղալ որպես բանկի պաշտոնական ներկայացուցիչ»,- ասել է Ժույյեն:
Նրա կարծիքով՝ բանկի կառավարման համակարգը միայն կշահի այն բանից, որ նախագահը տղամարդ է, փոխնախագահը՝ կին:
Երեքշաբթի Ռուայալը, որը 2007 թվականին Սոցիալիստական կուսակցությունից որպես թեկնածու առաջադրվել է երկրի նախագահի պաշտոնում, ներառվել է բանկի տնօրենների խորհրդում որպես տարածաշրջանների ներկայացուցիչ:
Ներկայում նա զբաղեցնում է երկրի արևմտյան Պուատու-Շարանտայի տարածաշրջանի խորհրդի ղեկավարի պաշտոնը: Անցած տարի նա հավակնել է խորհրդարանի ստորին պալատի ղեկավարի պաշտոնին, սակայն պարտվել է խորհրդարանական ընտրությունների երկրորդ փուլում:
Պետական ներդրումային բանկը ստեղծվել է 2012-ի հոկտեմբերին՝ փոքր և միջին բիզնեսի աջակցման համար:
