Թուրք վերականգնողները լրջորեն վնասել են ավելի քան տասնյակ հինհռոմեական խճանկարներ Թուրքիայի հարավում գտնվող Հաթայ գավառի Անթաքյա քաղաքում գտնվող խճանկարների` աշխարհի ամենամեծ թանգարանում: Այս մասին գրում է Hurriyet պարբերականը:
Նշվում է, որ սկանդալ է ծագել այն բանից հետո, երբ խճանկարների տեղացի վարպետ Մեհմեդ Դաշկալանը դրա վրա է հրավիրել մամուլի ուշադրությունը:
«Վնասված են հռոմեական շրջանի արժեքավոր գտածոներ: Դրանք վերածվել են հենց իրենց ծաղրանկարների: Որոշ պատկերներ գտնվում են հատկապես վատ վիճակում, կորցրել են իրենց օրիգինալությունն ու արժեքը: Դրանց արդեն չի կարելի անվանել մեր թվարկության II դարի օրիգինալ խճանկարներ»,-ասել է Դաշկալանը:
Նա ընդգծել է վերականգնողական աշխատանքների դադարեցման անհրաժեշտությունը, որպեսզի վնասվելուց փրկվեն անտիկ արվեստի մյուս գործերը:
