Չորեքշաբթի օրը Հունաստանում տեղի կունենա այս տարի առաջին համընդհանուր գործադուլն ընդդեմ տնտեսելու միջոցառումների, որոնք ձեռնարկում է կառավարությունը ԵՄ-ի և ԱՄՀ-ի վարկերի դիմաց,- հայտնում է korrespondent.net-ը:
Միջոցառմանը կմասնակցեն բոլոր պետական հիմնարկներն ու ընկերությունները, տրանսպորտը, բանկերը, հիվանդանոցները, դատարանները, դպրոցներն ու համալսարանները: Գործադուլ կանեն նաև մասնավոր սեկտորի աշխատողները: Աթենքում նախատեսված են երկու մեծ արհմիութենական ցույցեր:
Գործադուլ կանեն նաև երկաթուղիներն ու մարդատար լաստանավերը: Աթենքում ավտոբուսներն ու տրոլեյբուսներն ընդհատումներով կընթանան: Մետրոն նորմալ ռեժիմով կաշխատի՝ բացի օդանավակայն տանող հատվածից:
Մետրոյի աշխատակիցները կաշխատեն քաղաքացիական մոբիլիզացիայի կապակցությամբ, որը կառավարությունը հայտարարել է հունվարին՝ 10-օրյա գործադուլը դադարեցնելու համար:
