Մեծ Բրիտանիայի խորհրդարանի ճաշարաններից հանվել է 4 անուն մսամթերք, որոնք, հնարավոր է, ձիու միս են պարունակում: Այս մասին հայտնել են խորհրդարանի ներկայացուցիչները:
Խորհրդարանականների սննդի կազմակերպության ծառայությունը հետ է կանչել կիսաֆաբրիկատները: Մսամթերքներն օգտագործվել են ճաշատեսակներ պատրաստելու համար Վեսթմինսթերյան պալատի 28 ճաշարաններում, բուֆետներում, ռեստորաններում և սրճարաններում: Այնտեղ սնվում են Համայնքների պալատի, Լորդերի պալատի անդամները և խորհրդարանի աշխատակիցները՝ նշում է ITAR-TASS-ը:
Բրիտանական ԶԼՄ-ների հաղորդմամբ՝ պետության հատկացումների շնորհիվ ուտեստները ճաշարաններում վաճառվում են իջեցված գնով: Այս նպատակով պետությունը տարեկան հատկացնում է 9 մլն դոլար:
Բռնագրավված սննդամթերքն ուղարկվել է փորձաքննության:
Եվրոպայում «մսային սկանդալը» բռնկվել է անցյալ շաբաթ, երբ փորձաքննության արդյունքում պարզվել է, որ տավարի մսի փոխարեն ձիու մսից պատրաստված սննդամթերք է վաճառվել:
Նման դեպքեր գրանցվել են Մեծ Բրիտանիայում, Գերմանիայում, Իռլանդիայում, Իսպանիայում, Կիպրոսում, Լյուքսեմբուրգում, Ռումինիայում, Ֆրանսիայում և Շվեդիայում:
Գործը հետաքննվում է ԵՄ անդամ երկրների կառավարությունների մակարդակով, հետաքննությանը միացել է Եվրոպոլը: