Մարդու իրավունքների եվրոպական դատարանի մեծ պալատն Ավստրիային 38 հազար եվրո տուգանքի է ենթարկել՝ լեսբուհի զույգի նկատմամբ խտրական վերաբերմունքի համար. կանայք վիճարկել էին երկրի իշխանությունների իրավունքը՝ մերժելու իրենցից մեկին որդեգրել մյուսի երեխային:
46-ամյա լեսբուհիներն արդեն երկար տարիներ միասին են ապրում և մեծացնում են նրանցից մեկի երեխային, ով ծնվել է 1995 թ. արտամուսնական կապից: Երեխայի ծնունդից անմիջապես հետո մոր զուգընկերուհին, որպես երկրորդ ծնող, որոշել է որդեգրել նրան և դրա համար հարցում է ներկայացրել: 2005 թ. և 2006 թ. շրջանային և տարածաշրջանային դատարանները միասեռական զույգին մերժել էին` նշելով, որ ըստ ավստրիական օրենքների՝ երեխայի ծնողներ կարող են լինել 2 տարբեր սեռերի ներկայացուցիչներ: Դատարանը նաև հաշվի էր առել այն հանգամանքը, որ կենսաբանական հայրը հանդիպում է երեխայի հետ: 2006 թ. հերթական բողոքարկումը կասեցրել էր Գերագույն դատարանը` քաղաքացիական օրենսգրքի նորմերը համարելով լիարժեք համապատասխան Սահմանադրությանը:
2007թ. ապրիլին կանայք հայց էին ներկայացրել Եվրոպական դատարան՝ բողոքարկելով այդ որոշումը: Լեսբուհիները նշել էին, որ ավստրիական իշխանությունները իրենց նկատմամբ սեռական խտրականություն են դրսևորել, քանի որ որդեգրումը կիրականացվեր, եթե զույգը հետերոսեքսուալ լիներ: Նրանց կարծիքով՝ Ավստրիան խախտել է մարդու իրավունքների կոնվենցիայի 14 և 8 հոդվածները, որոնք արգելում են սեռական խտրականությունը: 2012 թ. գործը դատարանը վերցրել էր քննության:
Դատարանը 10 կողմ, 8 դեմ ձայների հարաբերակցությամբ վճռել է, որ, իրոք, խախտվել են կոնվենցիայի վերոհիշյալ հոդվածները:
Դատարանը 11կողմ և 6 դեմ ձայների հարաբերակցությամբ ավստրիական իշխանություններին պարտավորեցրել է 3 ամսվա ընթացքում կանանց վճարել 10 հազար եվրո՝ որպես հոգեբանական վնասի փոխհատուցում, և 28,4 հազար եվրո՝ դատական գործընթացների ծախսերի փոխհատուցում:
