Մեկ շաբաթից քիչ է մնացել Իտալիայում կայանալիք համաժողովրդական ընտրություններին, սակայն քաղաքացիների մեկ երրորդը դեռևս չի կողմնորոշվել, թե որ թեկնածուի օգտին է քվեարկելու:
Corriere della Sera-ի կողմից իրականացված հարցման արդյունքներով՝ չկողմնորոշվածների և քվեարկությանն ընդհանրապես չմասնակցողների թիվը կազմել է 27,7 տոկոս:
Չկողմնորոշվածների մեծամասնությունը միջին տարիքի, ցածր կրթությամբ տնային տնտեսուհիներն են, ովքեր հիմնականում բնակվում են Իտալիայի հարավում:
Հիմնվելով նախկին ընտրությունների վրա՝ կարելի է հաստատ ասել, որ նրանք, ովքեր դեռևս չեն կողմնորոշվել, ընտրություններին ընդհանրապես չեն մասնակցի:
Հարցումները ցույց են տվել, որ ձախակողմյան Դեմոկրատական կուսակցությունը խորհրդարանի ստորին պալատում կկազմի մեծամասնություն, սակայն այն պետք է կոալիցիա կազմի ներկայիս վարչապետ Մարիո Մոնտիի կենտրոնամետ դաշինքի հետ:
Բեռլուսկոնիի կուսակցությունն առաջատարին զիջում է 6 տոկոսով: Սակայն չկողմնորոշված զանգվածի մեծ մասի համար հնարավոր է վերջին օրերի քարոզները որոշիչ դառնան:
Հարցումները ցույց են տվել, որ իտալացիների շրջանում մեծանում է հիասթափությունը կառավարության նկատմամբ, քանի որ երկրի տնտեսությունը գնալով անկում է ապրում:
Իտալիայի նախկին վարչապետ Սիլվիո Բեռլուսկոնին, ով ղեկավարում է աջակողմյան ուժերի բլոկը, հայտարարել է, որ կհարբի, եթե երկրի վարչապետը և նրա կողմնակիցները փետրվարյան ընտրությունները ձախողեն և ներկայացված չլինեն Ներկայացուցիչների պալատում: Բեռլուսկոնին երկրի վարչապետի պաշտոնում իր իրավահաջորդին անվանել է «պրոֆեսորիկ» և «մարդ, ով տնտեսությունից ոչինչ չի հասկանում»: Մոնտին իր հերթին, հանդես գալով հեռուստատեսությամբ, Բեռլուսկոնիին և նրա շրջապատին անվանել է «անպիտաններ»:
Իտալիայում խորհրդարանական ընտրությունները կկայանան փետրվարի 24-25-ը: