Ֆրանսիայի նախկին նախագահ՝ ներկայումս UMP աջամետ շարժման առաջնորդ Նիկոլա Սարկոզին ցանկանում է փոխել իր կուսակցության անունը: Առաջարկված տարբերակը՝ «Հանրապետականներ» (Les Repoublicains) է: Այս մասին է հայտարարել UMP-ի փոխնախագահ Նատալի Կոստյուշկո-Մորիզեն: Կուսակցության վերանվանումն ուղղված է քաղաքական ուժին նոր կողմնակիցներ ներգրավելուն, գրում է kommersant.ru-ն:
Նիկոլա Սարկոզիի կուսակցության նոր անվանումը կընդունվի կամ կմերժվի քվեարկության արդյունքում, որը կկայանա մայիսի 28-29-ը՝ կուսակցական նստաշրջանի նախօրեին: Սարկոզին նախկին UMP-ի փոխարեն նախընտրում է «Հանրապետականներ» անվանումը, որի վարկանիշն ընկել է՝ անցած նախագահական ընտրություններին անհաջողության և կուսակցության անվան հետ կապված մի քանի սկանդալների պատճառով: Անցած տարվա վերջին կրկին ստանձնելով կուսակցության ղեկավարությունը՝ Սարկոզին սկսել է բարեփոխել այն և պատրաստել նախագահական ընտրություններին, որոնք կկայանան 2017 թ.: Անվանման փոփոխությունն այդ գործընթացի մասն է կազմում:
Հարկ է նշել, որ այս նախաձեռնությունը ոչ բոլորն են հավանության արժանացրել: Հատկապես խոսքը Ալեն Ժյուպեի մասին է, ով 2002 թ. կուսակցության համահիմնադիրներից մեկն է եղել: Հենց նա է պնդել, որպեսզի նոր անվանումը կուսակցության քվեարկությանը դրվի:
Ինքը՝ Սարկոզին, համոզված է, որ «Հանրապետականներ» անվանումն ավելի լավ է, քան UMP հապավումը: «Հանրապետությունը միավորում է»,- ասում է նախկին նախագահը, ով այժմ ակտիվորեն նոր կողմնակիցներ է փնտրում:
