Լեոնարդո Նոտարբարտոլոն, որը 2003թ. Բելգիայում կազմակերպել էր «դարի ալմաստե կողոպուտըը» և Անտվերպենի ալմաստե կենտրոնի պահոցից հափշտակել էր ավելի քան 100 մլն եվրոյի թանկարժեք իրեր, վաղաժամ ազատ արձակման պայմանները խախտելու համար դարձյալ հայտնվել է բանտում:
Ինչպես հայտնում է RIA Novosti-ն, հղում կատարելով տեղի ԶԼՄ-ներին, այս անգամ Նոտարբարտոլոն ձերբակալվել է Փարիզի Շառլ դե Գոլի անվան օդանավակայանում:
2011թ. նոյեմբերին բելգիական իրավապահ մարմինները նրան ձերբակալելու եվրոպական հրամանագիր էին ստորագել վաղաժամ ազատ արձակման պայմաններին չհետևելու համար. նա չէր փոխհատուցել թանկարժեք իրերի գողությունից տուժած մարդկանց, որոնց իրերը դեռ չեն հայտնաբերվել:
Ներկայում տղամարդը պետք է բանտում անցկացնի 1.443 օր, ինչպես ավելի վաղ դատապարտվել էր:
2003թ. Նոտարբարտոլոյի գլխավորությամբ հանցավոր խումբը ներթափանցել էր ու գողացել ավելի քան 100 մլն եվրոյի թանկարժեք իրեր: Նրա գողությունը մինչ օրս համարվում էր ամենաաղմկահարույցը: Գողության մասին իմացվել էր միայն 2 օր անց:
Չնայած անվտանգության կատարյալ համակարգին, ռադարին ու սեյսմիկ սենսորին, գողերին հաջողվել էր դատարկել 100-ից ավելի չհրկիզվող պահարաններ: Գողությունից մի քանի օր անց տղամարդուն ձերբակալեցին գողության կասկածանքով ու դատապարտեցին 9 տարվա ազատազրկման:
Նա վաղաժամկետ ազատ էր արձակվել 2009թ. ու մեկնել էր Իտալիա: Նրան արգելվել էր մուտք գործել Բելգիա:
