Ebay ինտերնետ աճուրդում արդեն սկսել են վաճառել Չելյաբինսկում ընկած երկնաքարի կտորները: Վաճառողների շարքում ոչ միայն ՌԴ քաղաքացիներ են, այլև ամերիկացիներ:
Ինտերնետային տարբեր կայքերում երկնաքարի կտորների վաճառքի տարբեր հայտարարություններ են հայտնվել, դրանց գինը տատանվում է 10-500 հազար ռուսական ռուբլու սահմաններում:
Իրավապահների ուշադրության կենտրոնում էր հայտնվել Ebay ինտերնետ աճուրդում հայտարարություն տված Սանկտ Պետերբուրգի մի քաղաքացի, ով տղամարդու բռունցքի մեծության քարի վաճառքի մասին էր հայտնել: Նա վստահեցրել էր, որ դա հենց փետրվարի 15-ին ընկած երկնաքարն է: Այն վաճառվում է աճուրդով: Ընթացիկ գինը 1125 դոլար է:
Մեկ այլ հայտարություն էլ ներկայացրել է Կամչատկայի մի քաղաքացի` առաջարկելով իրենից գնել սև ավազով լի փաթեթ, որը հավաքել է երկնաքարի անկման վայրից: Այս դեպքում ևս աճուրդ է հայտարարված, որի մեկնարկային գինը եղել է 10 դոլար և մինչ հիմա աճել է` հասնելով 24-ի:
Ամենավառը կարելի է համարել մուգ մոխրագույն, 2 սմ-ից մի փոքր մեծ քարի վաճառքի մասին հայտարարությունը։ Այն վաճառում է Լաս Վեգասի մի բնակիչ, որն իբր քարը ստացել է Ռուսաստանից: Նա իր հայտարարությանն է կցել 4 լուսանկարներ, որոնք նախկինում ներկայացրել էր Ассошиэйтед пресс գործակալությունը: Նա իր կողմից առաջարկվող քարի համար պահանջում է 999 դոլար: Եվ պատրաստ է այն վաճառել միայն ԱՄՆ տարածքում:
Արիզոնա նահանգի մի ամերիկացու ախորժակն ավելի համեստ է. նա երկնաքարի համար ցանկանում է ստանալ ընդամենը 50 դոլար: Իհարկե, նկարագրությունը բավականին տարօրինակ է: Ըստ նրա՝ այդ կտորը հնարավոր է լինի 2012 թ. ընկած DA14 երկնաքարի կտոր:
Կայքում կա առնվազն մեկ իր, որի իրական լինելու մեջ կարելի է վստահ լինել, դա շոգեխաշելու սարքն է, որը գետնին է ընկել և կոտրվել երկնաքարի անկման ժամանակ առաջացած պայթյունի ալիքի հետևանքով:
